EVAN. KHUP NASEPNA NIHNA

EVAN. KHUP NASEPNA NIHNA
Written by Kham Sian Pau
EVAN. KHUP NASEPNA NIHNA

II. KHA KHANLAWHNA IN ZOMITE NUNTAKNA A SUK LAMDANZIA

A. Gupkhiatna leh Khanlawhna thu kipomsiam

Khanlawhna a hual thumna hong tun main Zomi Pasian thu um mite sungah Gupna Bukim thu kithei kimlo ahih manin kitelkhialhna leh buaina tampi om hi. Jesu hong gupkhitna pen hell khuk sung pan suahtakna, vantung gam tun nading ciang bekin kitel a, leitungah gentheih haksatnate i thuakthuak ding mahin kingaihsun kha hi. “Hih leitung ah gentheih haksatna ih thuak hangin vantungah nopna tawh kidim ding hi” cih tawh ih kihehnem hi. Tua bekthamloin Jesu khazih in eite hong om pih ding a hong sawl Khasiangtho thu leh tua Khasiangtho ih zat nading (ih man nang) kitheilo hi. Khanlawhna hong tun ciangin Gupkhiatna a ngah Pasian thuzui mite ahuh a panpih ding a hong pai Huhpa Khasiangtho kipomsiam ta hi.

1. Gupna Bukim takin Zomite sungah nungta

A thumna kha hualpi hong tun ciangin Zogam khanlawh nadingin Pasian in a zat Evangelistte tungah Khasiangtho in gupna bukim thu hilhcian mahmah hi. “Jesu hong gupkhiatna in kha bek hong gum hiloin ih taksa mahmah zong hong gum hi, vantung ih tun ciangin nuam a sa pan dingte ih hi kei a, hih leitung nuntakna ah zong a pil a siam ding, a hau a mang ding leh a cidam a tha hat ding, a nuamsa dingte hi hang,” cih thu lim gen thei mahmah uh hi. Lamet beisa khangno tampi in Pasian tungah lametna thak nei kik thei uh a, pilna sin kikin, degree sang pipi ngah lawh uh hi. Pilna sin nawn lote in zong Pasian hauhna muang thei uh a, sum leh paii zongin lawhcinna lianpipi ngah ta uh hi. Topa Jesu hong gupkhiatna thu bukim takin Zomite sungah hong nungta thei ta hi.

2 . Khasiangtho pen ahihna bangin kipomthei

Kha khanlawhna ahih mah bangin Khasiangtho thu zong amasa khahual hunte sangin kitel zaw ta a, Khasiangtho pen ahihna bangin kipom thei ta hi. Huhpa Khasiangtho ahih mah bangin Pasian deihna tawh kituakin ngimna tupna lianpi nei peuh leng ei hih zawh ding a kilawm sangin a lianzaw kisem zo takpi ahih lam kithei cian mahmah ta hi.

3. Khasiangtho pen ahihna tannin kipomthei

Khanlawhna a hualmasa hunlai in Khasiangtho ahihna tan sangin ki-uangsak zaw a Jesu munah kikoih kha-in Gupkhiatna hong piapa bangin ki-uang gen ahih manin Khanlawhna a sang theilo tampitak om hi. Gupngahna leh khasiangtho ngahna a tuamin a kikhen banah Gupna ngahna pen Khasiangtho ngahna hilo a, Khasiangtho ngah lote vangam tung lo ding hi, kici sawnsawn hi. Lai Siangtho bulphuhna sangin thusuak bulphuh khakna zong om ahih manin a kilawm lo gamtat khakna, Topa Jesu dawnin khua mual khawngah va paina cihte hong om gawp hi.

A hi zongin khahual thumna ciangin Khasiangtho zong ahihna tanin kipomthei ta hi. Khasiangtho in ih lungsim hei-in ih mawhnate hong kiphawksak a Jesu hong Gupkhiatna thu hong telsak ahih lam kitel ta hi. Jesu hong musak, hong um sakin ih sungah hong teng den a, lam hong lakin hong huh hong panpih banah siamna tuamtuam hong pia hi, cih kisang siam ta hi. Kha Siangtho hangin siamna tuamtuam leh lawhcinna tuamtuam zong kingah takpi hi. Ama vangliatna tawh na lianpi kisem thei hi, cih kipom thei ta hi.

4. Khasiangtho piak siamna atuamtuamte zat nading kithei

Khasiangtho piak siamna a tuamtuamte(Gifts of Holy Spirit) vantung ih tun ciang ading hi loin hih leitung ih nuntak sung a zat ding hi, cih kipom siam thei ta hi. Tua Khasiangtho piak siamna a tuamtuamte hangin tu in Zomite mi pil, mi siam, mi hau, mi lian tampitak ki-om ta a, tua khanlawhna thu ih pom theih a kipan Zomite thupha ngah minam ih hihna a ni a ni cih phialin hong kilang toto hi.

B. Pasian Siampite kizahtak

Pasian mi zat Evangelistte in piangthakte tungah “Na Pastorte uh zahtak un” cih thu lim gen uh ahih manin crusade a kibawlna peuhpeuh ah Pastorte’ khasum kikhangsak hi. Mun khatkhat ah Crusade bei nitakin pawlpi Pastorte adingin sumpi donna upna kamciam piakna cihte kibawlsak zel a, pawlpi sung a Pastor teng kihawmsak hi. Evangelistte sangin Pastorte thupizaw hi, cih pen crusade bawl evangelistte mahmah in lim gen pha uh hi. Kha khanlawhna nasemte zong pawltai themthum loin amau omna pawlpi ciatah om hithiat uh ahih manin pawltai kawikawina tawm tuam hi. Evan. Langh Do Khup bang a pianthak ma a, a omna Zomi Baptist Convention mahah tuni dong om hi. Tua hangin Biakna makaite leh Pastorte muanna ngah ahih manin Tuiphum pawlpi sungah limtakin nasem thei hi. Pastorte letsong tuamtuam piakna leh anpal puakna, upna khaici tuhna cihte nidangin a kizang ngei nai lo hi a, tu-in kilim zat mahmah ta hi. Pasian’ siampite lungdamsak ding kithupi ngaihsut ta hi.

C. Pasian nasemte thupi kisa

Khanlawhna hong tun main Pastorte in a kha sum bek uh ngah uh a, ankhing kham a nuamsa om pha lo phial hi. Tua manin a tate nangawn un a pa’ za a luah ding uh ut loin ankhing kham zawk nading nasepte sem uh hi. Tua manin a pil a siam taktakte in Pasian nasem khol lozaw uh hi. Pasian nasep pen laitan sawm zolote nasep bangin kingaihsun kha hi.

Khanlawhna hong tun khit ciangin mi kimin Pasian nasep ding vaipuak lianpi (Great Commission ) a neih lamuh kiphawkin Pasian nasemte it-in zahtakin thupisakna hong khanglian hi. Zomi khangnote Pasian nasem dinga kipia, Laisiangtho sangkah hong tam mahmah hi. Zomi kumpi nasem Zomi a it a vei, thu ngaihsun Nu le Pa leh Ulian pawlkhatin, “Zomite Biakna lam bekbek ah kipia khinin Kumpi sungah Ulian omnawn kei le hang mi namdangte khutnuai tung khin ding hihang” ci-in patau liang uhhi. Pasian nasep thupi kisa mahmah hi.

D. Pasian nasep kithupi sak

Khanlawhna hong tunma in Pasian na sep ding kithupisak khol loin ei aituamna ciat tawh kibuai pha mahmah lel hi. Pasian na pen Pastorte sep ding lian bekin kingaihsun hi. Khanlawhna hong tun khit ciangin mi kim in Pasian na ih sep ding vaipuak lianpi (Great Commission) ih neihlam kiphawk ciat ta hi. Pasian nasem a, a pai manlo (or) a pai zolo kumpi nasemte leh sum zong paai zongte nangawn in a sum a paai uh leh a neihsate uh khamangthang zon nadingin piakkhiatna tawh Pasian’ na sem ta uh hi. Pan theihna dang a neilote in zong khamangthangte adingin antangin khitui tawh thu ngen uh a, sep theihna pan theihna lampi ciat panin Pasian na kisem ciat ta hi.

E. Gammial ah Missionary kipuak

Khanlawhna hangin Zomi Pasian thu-umte sungah khamangthang veina, gammial veina nakpi takin hong khanglian a, gamdang mite huhna kihello Zomite’ sum leh pai tawh mission nasepna tuamtuam hong om toto hi. Zomite in a piakkhiat, neihsa sum le paaite tawh Khitui Gospel Ministry in zong Kawlgam sungah a gammialna pen mun Zogam khanglam, Kanpetlet gamah 2002 kum panin hih lai gelh hun dong Missionary mi 31kipuakkhin a tulaitak mi 11 in a seplaitak ahihi.

F. Ki-itna hong khanglian

Khanlawhna hong tun khit ciangin khuasung vengsung, pawlpi innkuan leh mimal sungah ki-itna hong khanglianin khat leh khat kilungsim neihnate hong bei a, mawh kimaisakin itna laikuang ki-um khawm theita hi. A poi a baite leh tagahte hehpihna hong khang a, tagah kepna sang leh mi poi kepna cihte hong om hi. Mi zawngte huhna panpihna tuamtuam kinei ciat hi.

G. Pawl kideidanna hong veng

Khanlawhna hong tun main Zomite lakah pawlpi kideidanna nasia mahmah a, beh khat phung khat nangawn Pawlpi a kibat kei leh si kigallo cih zah dongin a ki-innlamtan nangawn om ngei hi. Khanlawhna hong tun khit a kipanin tua bang kideidannate hong bei a, nopna dahna ah no pawl ko pawl cih om loin kidahpih kinuampih thei ta hi.

H. Khuasung kithutuahna hong khang

Khanlawhna hong tun khit ciangin, khua sung veng sung kithutuahna hong khanglianin vai khat peuhpeuh khuazangbupin kisem khawm thei ta hi. Pawlpi kibanglo, pawlpi khat leh khat kilawntatna nei khawmin biakna kipia khawmthei ta a, Pawlpi kideidan loin khuazang bupin Pawipi zindo khawm, Lungdam bawl khawm, kumthak dawn khawm cih bangin a tuamtuam kilawmtatna (fellowship) kinei khawm thei ta hi. Khuazang buppi-in Pasian kibia khawm thei ta a, biakinn lian penpen zangin biakpiak khopna, crusade bawl khopna cihte hong om hi. Gamdang a omte in zong pawlpi deidan loin a khua buppi huamin Pasian mi zatte crusade bawlsak zel uh a, tua bek tham loin khuazang buppi adingin khuaphia mei, tui nak hoih leh sanginn hoihte vai hawmsak uh hi. Khua khatah khat ii hauh pen kinoptuampih taktak ta hi. 1990 ma lam leh a nung lam Zogam khantohna nakpi takin kikhai hi. A kumkumin khuatate zong inn leh lo hoih semsem a, nuntak khuasakna kilaih mahmah hi.

I. Lasak (ladeih) hong kikhel

Zomi khangno a tamzaw la siamin ih minthan loh hangin ih omna peuhpeuh ah la sain a awng awng nuamte ih hi se hi. Khanlawhna hong tun main ih Zogam mun citengah zawlla sain khangnote awng vangvang uh hi. Biak kikhopna munte ah zong ZBC labu sung (hymn)te bek kisa thei hi. Khanlawhna hong tunkhit ciangin Zomi a kuamah peuh zawlla sa cih bang hong om nawn loin Zogam mun citengah khanlawhna late vive kisa ziahziah ta hi. Lasiam a lakhui bawlte (cassette) nangawn in zawlla hong khum nawnlo uh a, Pasian phatna la bekbek in Zogam leh Zomite sung hong luah hi. Hih pen 1990 kum leh kum 2000 kikal kum sawm sung hi pha diak hi.

J. Kampauzia hong kikhel

Zomite pen atamzaw khelpau leh ciamnuih gen a ut phadiakte ih hi hi. Ih kiho ciangin zong awtolin hamsiat leh kam khelpau ih siam mahmah hi. Tua bek tham loin nu leh pa zahmawh kammal tawh ciamnuihna nuam ih sa a, ciamnuih thanghuai kinakzat mahmah hi. Ei sang a ginalozaw khat peuh ih muh ciangin zahpihna kam leh simmawhna kam tawh ih hopih kha zel hi. Khanlawhna hong tun khit ciangin Zeisu khazih itna hangin mikim it theihna kinei ta a, mi ih hopih ciangin zong itna kam leh zahtakna kamte zangin kam hoih kam khum tawh kihoin a thanghuai ciamnuihkamte kizang nawnlo hi. Pulpit tung khawngah ciamnuih thanghuai gentehnate kizang nawn lo a, biakna kampau kisiam ta hi.

K. Khangnote khuamuhzia hong kikhel

Khanlawhna hong tun main Zomi khangnote in khua sung a, a gilo pen kilai hat pen cih khawng thupi kisa hi. Kuamah kihta lo a, zukhamkhamte peuh, a thagumhatte peuh kipi muhin kikihta a, thupi kisa mahmah hi. Khanlawhna hong tun khit ciangin Pasian thu umin khamthei guihthei zang lo a, mi tawh a kitawng ngeilo, biakinn ah a kikhawm zodente thupi kisa zaw ta hi. Kham theih guih theih leh gitlohna a zang lo, ama pumpi a ukzo, a kemzote kizahtak a, pilna siamna anei khangnote ki-engin thupi kisa zawta hi. Sum leh paii zongin a khangno lai mah a, a haute thupi kisain a pianna a nu leh a pa a lungdamsak, inn hoih inn nuam ah a tengsak, an lim tui lim tawh a vak zote thupi kisain kizahtak thei ta hi.

L. Khuamuhna hong khanglian

Khanlawhna hong tun main Zomi khangno a tamzaw, koimah kipuapial lo a, ei khua ciatah kiphasak mahmahin mikhual hong pai bang a om ciangin, khangnote in a thu omlo pi-in kivua thei hi. Khanlawhna hong tun ciangin ih muhna a toilam kiphawk a, Zomi khangno a kuamahpeuh in ih pianna khua ciat pan pusuakin mi’nuntakzia mi’ khuasakzia bat zawh nadingin lampi zongin kihanciam ciat ta hi. Zindo siam kidem zaw tain zinte leh mi khualte mawk vuak cih bang om nawn lo hi.

M. Sumzonna lamah kikhangto

Khanlawhna hong tun main Zomite sungah sum zong paai zong kitam loin Zogam gamtulpi mah khokhoin, lokhawh singpuak tawh a kivak ih tamzaw hi. Sum zong sunsunte zong vankham (khamtheih guihtheih zuak) sem kitamzaw hi. Khanlawhna hong tun khit ciangin sumzon paaizonna ah nakpi-in kikhangto a, thuman leh Pasian awikai takin sum kizong thei ta hi. Zogam Kawlgam bek hinawn loin leitung gam tuamtuam ah sum zong paii zongin tampitak ki-om ta hi. Tua gamdang pan a ih thalawh sum leh paiite Zogam leh Zomite sungah kizang ahih manin ih pu ih pate’ lam zawh loh Taih inn Mawtawte a kipan van hoih nonote Zomite neihsa hong suak takpi ta hi. Zomite sungah a nungta Pasian a thupi pen a sang pen munah ih koih theih manin ih luah ih ngah Zogam khanlawhna thuphate ahi hi. (e.g. Malaysia, Singapore, Japan, USA, England, Germany, South Korea, Austrilia etc.).

O. Pilna lamah ki khangto

Khanlawhna hong tun main Zomi sungah Biakna lam hita leh leitung lam hita leh pilna sang nei, Doctorate Degree ngah cihte ih om tei hangin kitam hetlo hi. Bekthamlo in gamdangah pilna sin a paizo kitawm mahmah hi. Khanlawhna hong tun khit ciangin Zomite sungah Biakna lam hita leh leitunglam hita leh pilna sang nei, Doctorate Degree ngah hong khang mahmah hi. 1190 kum masiah Zomi khangno Siavuan MBBS tawm mahmah a, khanlawhna hong tun khit ciangin Zomi khangno Siavuan Doctor tampi hong piang hi. Hih pen khanlawhna hangin a piang Topa Pasian’ hong piak thupha lianpi ahi hi. Kawlgam sung bek hiloin gam tuamtuam ah Biakna lam hita leh leitunglam hita leh pilna sangzaw a sin tampi kiom ta hi. (eg. India, Malaysia, Singapore, Japan, USA, England, Germany, South Korea, Australia etc.).

P. Minam itna hong khang

Khanlawhna hong tunma in minam it ding leh puah ding zun ding ahih lam a thupi ngaihsut kitawm mahmah a, minam vai a gengente zong thupi kisa hetlo lel hi. Khanlawhna hangin Pasian a it taktak a piangthak taktak Zomite lungtang sungah “Jesu in kha bek hong gum hiloin pumpi taksa mahmah zong hong gum hi” ci-in ki-um ahih manin khamangthang veina leh minam veina hong khang mahmah hi. Biakna thu kikupnate leh thuhilhna tuamtuamte ah zong Zomi bup a huam tawntung thu kikupna, thuhilhna kammalte kizang ciat ta hi. Leitung mun tuamtuam ah Zomi kipawlna tuamtuam hong om kawikawi ta hi.

Q. Zomi Leitung in hong theihna khang

Khanlawhna hong tun main minam hihna a thupi ngaihsut kitawm mahmah a, Zomi ih hihna minam dangte kiangah kigen ngam lo hi. “Zomi hing” ih cih ding zum ngaihsut kha ih hih manin Zomi ih hih lam hong thei zong tawm mahmah pah hi. Khanlawhna hong tunkhit ciangin Zomite in Pasian it thei ta ih hih manin Zomi a hong bawl Pasian tungah kilungdam thei panpan a, minam puah ding leh zun ding kithupi ngaihsut mahmah ta hi. Khanlawhna hong tun main minam dangte lak a teng Zomite in ih Zopau leh ih Zolai pen inn sung pau-in a zang kitawm mahmah hi. Khanlawhna hong tun khit ciangin bel gamdang a suakte nangawnin ei’pau mah hong pau thei ta uh hi. Ih tun tunna munah Zomi kipawlna omsak ciat ta ih hih manin Leitung in hong theihna khang tuam hi.

R. Kipumkhatna hong khanglian

Khanlawhna hong tun main Zomite in khua kipawlna, beh kipawlna, kampauzui a namneu kipawlna leh biakna zui a kipawlna (Denominationalism) cih bangte kithupi ngaihsut mahmah a, ei bek mi kisain ei’ thubek thu kisa hi.

  1. Khanlawhna hong tunkhit ciangin Zomite ngaihsutna hong kihong a, ko beh, ko khua, ko phung, ko nam leh ko pawlpite bek cih lungsim hong bei-in Jesu sungah pumkhat hi hang cih lungsim kinei thei ta hi. Tun sung khat a piang Zomite unau sanggam khat ih hih lam kiphawkin Zomibup kipumkhatin kalsuan khoptheih nading lamsang kipi ngaihsut zawta hi.
    Pawlpi kideidan nawn loin Pasian thu nungta a gen takpi ahih nak leh pawlpi namkim phialin kingai khawm thei ta hi. (eg. Fr. Felix Lian Khen Thang Bishop a kipiak ni-in Tuiphum pawlpite, AG pawlpite leh pawltuamtuam kigawmin Zomi lasiam mi 500 valin Haleluijah Chorus lapi sakin kilungdam pih hi. R.Cte biakpiakna ah va kihel uh hi. RC pawlpite zong a lungdam mahmah uh ahih manin Haleluijah lapi a sa teng nek dingin bawngtal khat pumpiak lian uh hi.)
  2. Pastorte in zong ama pulpit tungah pawldang Pasian’ mizatte Pasian thu gensak a, aman zong pawlpi dangte pulpit ah Pasian thu va genin pulpit kizatkhel thei ta uh hi. Hih pen Zomite sungah a om ngei nailo Pasian hong gawm tuahna khat ahi hi.
  3. Gamdanga tung Zomite in zong Zomi innkuan, Zomi Christian Fellowship, Ciimnuai innkuan cih bangin Zomi bup a huam kipawlnate thupi ngaihsutin kipawlna tangzai hong neita uh hi.
  4. Zomite ih tamna pen mun khat ahi, Kawlpi (Kalaymyo)ah zong kideidanna a omlo Zomi bup a huam, Zomi Khangno Kipawlna (Zomi Youth Association) hong nei thei ta uh hi. Zomite sungah cimawh dongtuakte panpihin Zomite sungah a om ngei nailo, “Zomi Sisan Hawpna” (Zomi Blood Donation Service) kinei ta a, sisan kisam a si ding mitampitak nuntakna, sisan hawpna tawh kihonkhia khin ta hi.

S. Naupang pattahna

Khanlawhna hong tunma in a om ngeinailo naupang pattahna (Nursery) Sang hoih tampi kinei-in Naupang pattahna tawh kisai leitung gambup thukimna (Child rights and Child Proctections) zui-in Zomi naupangte kipantahta hi.

T. Zogam hong paal

Khanlawhna thupha tawh ki-itna, kipumkhatna, thu muhna, pilna siamna leh hauhna hong khangin Zomite in ih omna mun ciat panin Pasian leh minam itna tawh ih pawlpi, ih khua ih tui ciat leh Zogam ih puah manin Zogam hong nosuakin khuatate nangawnah mei(electric) hong tang ziziah ta hi. Biakinn hoih tampi leh inn hoih lo hoihte tawh Zogam kizem a, Zo vontawite ih pu ih pa tuan ngeiloh mawtaw cycle leh mawtaw hoih nonote tuangin kihawh kikawm in kiom ta hi. Zogam khanlawhna lianpi hong tun main lenpaan a kaisa ih Zogam tu in heisa bang hong pal kik ta hi.

Theihding;
Zomite pilin siamin minam dangte tawh liangko kikim ta hang, hau ta lian ta hang a ci ih hi kei a, khanlawhna hong tunma tawh tehna-in nakpitakin khangto hang, a ci ih hizaw hi. Ih khantoh lai nading, nam liante ih bat nading tampi kisam lai ahih manin a tawp, a dawn tung bangin kingaihsun kha kei ni. Thupha tawh buai-in thupha hong piapa ih Pasian ih mangngilh, ih nusiat khak ding kidawm ciat ni. Pasian in hong lamto ahih manin mun dang gam dangah ih tate ih pantah thei hi. Ih pau ih ham nusia pah kei ni.

Ih Zo lai pen Sangmang Cope topa in hong puak Pasian thu bulphuh a kibawl LAI hi a, ih khua muh masakna ih mitkeuh masakna ahih manin Cope topa mangngilh kei ni. Cope topa leh Sangmangte pen Zogam khanlawhna a piangsak pupite ahi uh hi. Pasian thu tawh khanlawhna in Zomite a khangkhangin hong lamto hi. Zomite pilna siamna, hauhna phatna, cidamna leh thumuh thutheihna a kici khempeuh biakna lam ahi zongin leitung lam ahi zongin KHANLAWHNA tawphah thuphate ahi hi.Tua ahih manin KHANLAWHNA pen Zomite adingin lungdam huai pha diak hi.

III.EVAN. LANGH DO KHUP TANGTHU (atomkim)

Thawmte beh Pu Vungh Thang leh Ngaihte beh Pi Do Zen Cingte’ tapa hi a, 24.12.1968 kum in Tonzang gamkhen Kansau (A) khua ah suak hi. Unau pasal 7 pha uh hi.

  1. Pa Langh Za Kap
  2. Rev. Cin Za Mung C.Th, B.Min.
  3. (Sgt. Laang Suan Pau)
  4. Pa Tuan Khaw Pau
  5. Evan. Langh Do Khup
  6. Pastor Kham Kap Lian B.Th
  7. Sia Kham Sian Pau B.Th., B.D., M.Div., M.Th

1978 kum in a nu si a, 1985 kumin a pa si ahih manin tagah mahmah hi. Lai tan giat ciang bek sim hi.

5.1.1996 (Sun) ni-in Samte beh Pu Sial Cin leh Pi Ning Za Ciinte’ tanu Lia Cing Suan Niang tawh Rev. Go Khen Thang in Kansau (A) Tuiphum pawlpi biakinn sungah Siangtho kitenna neisak hi. Topa’ thupha tanu tapa nga nei hi.

  1. Tg. Thang Muan Mang @Mangpi M.Div. I yr.
  2. Lia Cing Ngaih Kim @Kimbawi B.A (Eng.)
  3. Tg. Cin Sian Tuang @David    B.A  (Eng.)  I yr.
  4. Lia Ciin Khawl Lun @Lulun Grade V
  5. Tg. Nang Lam Thang @Thangpi Grade IV

29.8.1990(Wed.) ni-in piangthak hi. 15.1.1991(Tue.) ni-in Rev. Neng Suan Thang in Tuivai lui ah Tuiphum hi. A pianthak kum mahin Topa leenggah huanah nasep kipan pah hi.

  • 1991 Kumin “Nuntak kikna” kici lakhui 200 hawm khia hi.
  • 1994 Kumin “Khitui Gospel Nasepna” phuan hi.
  • 1996 Kumin “Khitui Gospel Lainatna Aw” kici laikhui 2000 khawm khia hi.
  • 1998 Kumin Australia gam ah Pasian thugen in pai hi.
  • 2000 Kumin “Hauhna leh Khansauna Thusim” kici laibu 2000 hawm khia hi.
  • 2001 Kumin Japan gam ah Pasian thugen in pai hi.
  • 2002 Kumin Singapore leh Malaysia ah Pasian thu genin pai hi.
  • 2002 Kumin Khitui Gospel Nasepna (Tears Gospel Ministry) sungah “Khitui Gospel Mission Nasepna” (Tears Gospel Mission Dept.) behlap a, gammial nasep kipan hi.
  • 2003 Kumin “Ngaih Anglai Ah” kici Video CD hawm khia hi.
  • 2004 Kumin “Hauhna leh Khansauna Thusim” bu 1000 bawl kik hi.
  • 2004 Kumin Tedim Bethel Bible College ten pahtawina tawh Bachelor of Christian Ministry (B.C.Min.) pia uha, Thesis in “Khitui Gospel Nasepna” laibu bawl hi.
  • 2005 Kumin “Ngaih Anglai Mah” kici Video CD hawm khia hi.
  • 2006 Kumin “Ngaih Anglai” kici Video CD hawm khia hi.
  • 2007 Kumin India Manipur Zomi ten “Hauhna leh Khansauna Thusim” bu 1000 bawlkik uh a, Manipur khut nuai a om Zomi omna Universityte ah B.A IIIyr ten sang laisimbu in tawi uh hi.
  • 2007 kum in Malaysia ah Zomi Christian Fellowship, Kualalumpur khuapi ah crusade va bawl hi.
  • 2007 kumin Sermon VCD Malaysia ah a crusade bawlna hawm khia hi.
  • 2008 Kumin India Mizo gam, Moreh, Lamka, Shillong, Guwahati, Delhi, Pune, Bombay khuate ah Pasian thugenin pai hi.
  • 2009 Kumin Malaysia ah Pasian thugenin pai hi.
  • 2009 kumin S.Korea ah Pasian thu gen in pai hi.
  • 2009 Kumin www.tearsgospel.com kici biakna website khat hongkhia hi.
  • 2010 kumin Australia ah Pasian thu genin pai hi.
  • 2010 kumin COPE topa phawkna SIAN ANGLAI AH DR. J.H COPE kici DVD bawl khia hi.

Zomite khalam leh taksa lamah ih khanlawh nading, ih mit hong kihonna dingin a tuam vilvelin Pasian in hong zatsak Evan. Langh Do Khup hi a, Zogam singtang khua tampi sikin Pasian nasem a, 1990 kum pan 2011 ciang crusade lianpi 170 vei valbang bawl khinin crusade neute tawh gawmin 400 vei val bawl khin hi. (* Crusadepi ni 5 tungsiah, Crusade neu ni khat pan ni nga kikal* *Thu hilhna pan mi khat apianthak nak leh crusade in sim hi.*)

Pasian biakna la, Gam ngaih la, Zawl la leh Zola (pupa’ awkaih) dawng tampi phuak a, ama phuah khanlawhna late bang kideih mahmah hi. “Lainatna ‘aw’(or) Itna Sisan Luangin” cih la bang pawlpi tampi in sumpi donna la-in zang uh a, pau nam tuamtuam ten zong amau pau tawh lekkhia-in sa uh hi. Pasian in leivui panin a laptohna leh gamdang dongah Lungdamna thu genin a paisakna, Misite tho, Dawiveite pil, cinate dam, Dawimangpa hencip mi tampi in suahtakna gupkhiatna a ngahna Pasian nalamdang bawl a muh khakte hih bangin pupa’ la awkaih tawh phuak hi.

(a) Zinmang laal hang ka nawh ni’n ee, tuizum lenmual kal ing ee.

(b) Zin laihen teng ka sutna aw, Sianmang’ namtem hiam sang ee.

“Hauhna leh Khansauna Thusim” kici laibu khat Khasiangtho lamlahna tawh gelhin Laisiangtho sung simloh laibu dang pan lalo (Quotation omlo) hi. Amah mah in Computer tawh khen a, Cover design zong suai in bookform in bawlpah hi. Tu-in ama gelh hih laibu, Lamka Manipur University, Manipur State, India ah B.A IIIyr. ten sang laisimbu in tawi uh hi.

Zomite minam dangte mah ih bat zawh nadingin ih mit hong keuhsak VCD hoihnono hong bawlsak a, a tangthu ding amahmah in gelhin, tua thu tawh kituak dingin la phuak pah a, amahmah in zaih(Shooting)in, amahmah mah in Editting zong hi. Cover design zong amahmah in bawl (suai) pah hi.

Na khat peuhpeuh a sep ciangin ama siamtawp suahin limtakin sem hi. Ama kalsuanpih Laisiangtho in, “Limtak in hih lecin, nang hong kisanglo ding ahi hiam?….” (Pian.4:7)cih ahihi.

(Hih tangthu pen Rev. G.K Nang in ama thesis sunga a hel ding leh Kalaymyo Agape pawlpite bawl Zogam Khanlawhna kici laibu sunga hel dingin amaute hong ngetna bangin a kibawl pak hi a, a hun tom ahih manin kicin lohna tampi om ding hi.)

Thu kaikhawm;
Sia Kham Sian Pau
Mission Director
Tears Gospel Ministry & General Secretary
Zomi Youth Association
Kalaymyo
Email: tpauno@gmail.com

Leave a Reply..