EVAN. KHUP NASEPNA KHATNA

EVAN. LANGH DO KHUP’ NASEPNA TOMKIM
(Khitui Gospel Nasepna Tomkim)
PAIPIH THULU: GUPNA BUKIM (TAKSA LEH KHA HONG GUM HI)

A tualniam lai a ma minamte lakah nasem ahih manin Gupkhiatna thu agen ciangin kha gupkhiatna leh taksa gupkhiatna thu tonkhawmsak hamtang hi. Kha Siangtho in mihing lungsim a khel mateng gamtat siatnate kinusia zolo hi, cih um ahih manin Kha Siangtho nasepna thupisak mahmah hi. Mi khat apianthak ciangin a gamtatna zong a kikhel hamtang ding hi, cih thu lim gen thei den hi. Crusade abawl ciangin nitak nga ahih kei leh nitak sagih bang hi zel hi. Nitak masa lamah gupkhiatna thu limgen mahmah a, nitak tawpna lam ciangin Piangthakte gamtat nading leh pianthakna hangin leitungah ih ngah ding hamphatnate limgen hi. Piangthakte agamtat a hoih hamtang nadingin hanthawn hi. Gupna pen gamtatna pha hang hilo, Upna tawh Pasian hehpihna hangin kingah (Efesa. 2:8) cih pen Gupkhiatna huangsung lutna ding kongpi pua lamah mawhneite muh dingin kisuang a, Gamtatna pha omlo upna in a si hi,(Jeim 2:26) cih pen piangthakte muh dingin Gupna huangsung kongpi tungah kisuang hi, ci hi.

Topa Jesu in zong kha thu a gen khit ciangin kha gilvahna bek tawh lungkim nailoin ama kiang a zuante a leitung gil uh zong a vah ding deih hi (Mat.15:32). Tua ahih manin ih Pasian in a hau ding a pil dingin hong deih hi, cih lim gen tawntung hi. Khangnote laisim hahkatin mipil misiam asuah nading uh nakpi takin hanthawn hi. Upna tawh na kalsuan ngamna zahzah Pasian in lawhcinna hong pia ding hi, cih thu limgen hi. Guallelhna lungsim nei-in guallelhna kammalte kiniamkhiatna-in a ngaihsun Zomite lungsim a kilaih zawh nadingin Pasian kammal tawh hanthawnin thapia tawntung hi. (Eg. Sabeng ten “Guai tuni sa man mah ni ei” ci kha leh sabetna ah kituahsia cih upnate pawl) Tua hangin mi tampi-in hauhna pilna ngah uh hi.

I. KHANLAWHNA HANGIN A PIANG THUTE
Zomite adingin tulaitak khanlawhna pen kha hual thumna ahi hi. Kha hual (KHA HUAL=Kha khanlawhna a hunhun a hong tungte khenna) masa pen 1940 kim pawlin a tung khanlawhna pen Mizogam lam pan hong kipan hi a, Zogam hong tun ciangin biakna makaite leh piangthakte kalsuan khawm thei nailo ahih manin pawl kikhenna neu khat hong piang hi. Mizo gam tawh gamgi dung teng hi pha diak hi.

Kha hual nihna pen 1970 kim pawlin sim leh mal panin hong piang hi. Kawlgam Zomite lakah Dr. Hau Lian Kham zangin Pasian in kha khanlawhna lianpi hong piangsak hi. Manipur Zomite sungah zong kha khanlawhna lianpi hong piang hi. ( *Manipur lam a Pasian mizatte nang na gelh tawm mai in, kei sangin nang telzaw ni teh*) Hih kha hual nihna zong Biakna makaite leh Piangthakte kalsuan khawm thei nailo ahih manin pawlpi kikhenna nasia takin hong piang a, Zogam ah pawlpi tuamtuam tampi hong kibehlap hi.
Kha hual thumna pen 1990 kum pawlin hong kipan a, hih laigelh hun dong ahi hi. Hih kha hual thumna pen amasate tawh kilamdanna lianpi khat om hi. Amasa kha hual nihte pen piangthak leh piangthak lo om khawm thei loin kituam khop uh hi. Ahih hangin hih kha hual thumna pen pawlpi namkim sungah lut a, Evangelistte zong pawlpi nam tuamtuam ah thu hilh in kisam kawikawi hi. Khanlawhna hangin pawlpi kikhenna om nawn lo hi. (*ZBC leh ZBCM kikhenna pen khanlawhna hang hilo ahih manin ka hel kei hi.*) Kha khanlawhna late zong minam dangte a panin kila loin Zomite phuah tualsuak late kisa ngelhngelhin lungdamna khituite hong tak keuhkeuh zel a, lungdam lua-in kilam ziahziah zel hi. Piangthakte in thuakzawhna neih ding leh mawh maisakna neih ding kilim gen ahih manin amasa kha hual nihte zahin makaite leh piangthakte kikalah buaina om lo hi. Makai tampite leh Pastor tampite zong piangthakte vive hong hita uh hi. Tua pen amasa kha hual nihte sunga a piangthak khangno Pastor tampi hong omna hang zong ahi hi. Kha hual masa nihte in kha hual thumna adingin noptuamna tampi hong pia hi.

A. A Lamdang Cidamna
1. Tuimang khua ah (1)
Crusade a kibawlna munte ah Pasian nasepna lamdang tuamtuamte zong hong om zel hi. Natna tuamtuam a nei mi tampi in damna ngah uh hi. Tua sung panin a lamdang deuh pawlkhat gen leng; 1994 kumin Tonzang gam Tuimang khua ah crusade a kibawl lai-in Hau Man a kici numeino khat a kawng nuaisiah zaw ahih manin lampai thei lo hi. Evan. Langh Do Khup leh a lawmten Hau Mante innah va pai-in thungetsak uh a, Pasian in a lamdangin damsak hi. Thu a nget kawmin Evan. Langh Do Khup in a banah lenin paipih a, thakhatin a khete khauhin lampai thei pahlian hi. Amah pen a pai theihloh zawh kha thum bang pha ta hi. Pasian damsakna a ngah ciangin lungdam lua ahih manin tua nitak mahin biakinn ah teci pang zo pah hi. Mipite in a vanglian Topa’ nasepna mu uh a, lungdamin khut beng ziahziah uh hi.

2. Tuimang khua ah (2)
Tua teci panna a zak ciangin kum sawm val a kawng nuaisiah zawin a lumcip Nu Hau Khan Zen in “Kei zong Hau Man bangin dam nuam ing, biakinn ah hong pua un” ci-in biakinn ah kipuasak hi. Ka dam mateng ciah nawn lo ding ci-in biakinn ah giak cip hi. Ni thum a cin ni ciangin Pasian phatin mipite lungdamin lam ziahziah uh hi. Nu Hau Khan Zen in “Topa aw, kei zong midangte mah bangin nangmah phatin lam nuam ingh, hong ding theisak tapeuh in” ci-in thungenin a tutna munah kap niloh hi. Tua laitakin Evan. Langh Do Khup pulpit pan hong tuaksuk a, “Nazareth Jesu min tawh ding inla Topa phat in” ci-in Nu Hau Khan Zen a domtoh leh hong ding thei mawk hi. Topa’ nasepna lamdangte a mit tawh a mu mipite lungdam lua in kap uh a, khut bengin kikona tawh Topa Pasian phat ziahziah uh hi.

3. Suangpi khua ah
1996 kumin Suangpi khua ah crusade a bawl lai un inn khat ah an ne dingin kisam a, inntekpi Pi Khup Dim a pumpi bup zaw in kum 21 sung lupna tungah lumcip hi. Khitui Gospelte in an nek main thungetsak uh a, Evan. Langh Do Khup a lupna tungah kahtoin a phot leh tua piteknu hong ding thei a, inn sung teng ah vial khat a paipih khit ciangin innka ah paisak uh a, a mu kha mi khempeuh lungdamin Topa phat uh hi.

4. Kalaymyo Pinlong Tuiphum Pawlpi ah
1998 kumin Kalaymyo Pinlong Tuiphum Pawlpi ah Khitui Gospel ten crusade a bawl lai-in Kha khanlawhna lianpi piang hi. Cina tampi in damna ngahin mitampi in pianthakna ngah uh hi. Nu Ning Do Cing a kici nupi khat, a khut lang khat a zaw thakhatin dam ahih manin Evan. Langh Do Khup thugenna microphone suhin teci pang pah thei hi. Mipite in Pasian nasepna lamdangte phatin khut bengin Haleluijah ci-in awng ziahziah uh hi. (*Crusade a kibawlna mun khempeuh ah cina tampite in damna ngah zel uh hi. Hih pen a lamdang tuan diak teng kong gelh uh ahi hi.)

B. Dawivei ten Damna Ngah
1. Kalaymyo, Munlai Tuiphum Pawlpi ah
1997 kum in Kalaymyo Munlai ah Khitui Gospel ten crusade a bawl laitakin dawivei numei khat thungetsak uh a, tua dawiveinu’ sung panin dawite thakhatin taikhia ahih manin thunget man phetin pilsiang pah hi. Tua crusade bei main teci panna nei thei pah a, mipite in a lamdang Topa’ nasepna mu uh hi. Mi tampitak kikhelin Topa kiang zuan thei uh hi.

2. Tedim gam Lailo khua ah
Tedim gam Lailo khua ah Khitui Gospel ten crusade a bawl laitakin dawivei nupi khat om hi. Tua nu pen Tedim khua sung a vak laitakin dawite in a mat uh hi a, Tedim siavuante kiangah a lah uh ciangin “Si ding ahih manin mawtaw kawm unla, manlangin ciah pih un” a cih uh ahi hi. Khitui Gospel ten an tangin thungenin Topa Jesu min tawh dawi hawlkhia uh hi. Tuate innkuan pen Tapidaw hi napi un zu huanin zubel tampi nei mawk uh hi. Khitui Gospelte in zubel teng leh dawi biakna teng inntual ah hal tumsak uh hi. A lamdang Topa’ nasepna hangin tua nu sung panin dawite taikhia a, a lamdang dam siangthona ngah pah hi. A lamdang Topa’ nasepna mu uh ahih manin Lailo khuate lungdam mahmah uh a, Khitui Gospel Team sungah zong kihel pah uh hi.
3. Manipur gam Sialsih khua ah
Manipur gam Sialsih khua ah Chin Baptist Associationte khawmpi om a, thu hilh dingin Evan. Langh Do Khup pulpit ah tu hi. Tua laitakin mi khat in Evan. Langh Do Khup kiangah “Kikhopna kong mai ah Lalpu a kici mi khat hai-in kitom gawp ahih manin manlangin hong pai in” ci-in sam khia hi. Evan. Langh Do Khup a tun ciangin zong tua tangvalpa kitom gawp lai a, amah a lente khawng tum gawp mawk hi. Kikhopna a subuai lo dingin tangval hat pawlkhat in tua tangvalpa upate inn ah paipih uh hi. Tua lai ah Evan. Langh Do Khup leh mi pawlkhatin thungetsak uh hi. Tua mi haipa in “No teng hawlkhiat hangin taikhia kei lua nung, hong hawlkhia zo beek kei nu teh” ci-in awng gawp a, a cilphuan khawng buakhia gawp hi. Ahih hangin Evan. Langh Do Khup in lungkia loin thungenin Topa Jesu min tawh dawite hawlkhia teitei a, thakhatin tua tangvalpa a tha hong zawin dam siang lian hi. Evan. Langh Do Khup zong kikhopna buk zuanin tai vingveng a, a hunzat ding lap man veve hi. A lamdang Pasian nasepna ahi hi.

C. A Lamdang kilemkikna
1991 kum in Evan.Langh Do Khup in Buanli khua ah Crusade a va bawl lai-in khamtheih guihtheih a zang khangno tampi a kikhel banah gupna ngah thak mi tampi kibehlah hi. Teek leh Mo kilemlote zong kha khanlawhna hong tun ciangin hong kilem kik thei uh hi. A teekte tawh a ki-innkhen dektak mo khat bang piangthak lua ahih manin, “Sia aw, ka teekte kiangah hong paipihin, mawh maina ngen nuam ing” ci liang hi. Sun kikhop man ciangin a teekte kiangah paipih uh a, a teeknu leh a teekpa mai ah zahtakna pia-in khukdin sukpah hi. Kisikna takpi leh kiniamkhiatna tawh mawhmaina ngenin khitui tawh thum ngeungeu hi. A teekpa bang lungdamlua kisain khitui tak keuhkeuhin Topa min tawh a monu thupha pia hi. Khat leh khat mawhna kimaisakin Pasian thupha sang uh a, tuni dong nuamtakin ki-innkuan thei uh hi. Tu in Evan. Langh Do Khupte tawh Kalaymyo ah teng khawmin ki-innveng uh hi.

D. Alamdang Mawhsutna
2005 kum January kha in Evan. Langh Do Khup ama pianna Kansau Khawk pawi ah thu hilh dingin va pai hi. Tua lai ah a lamdang mawhsutna pawl khat va tuak kha hi. 1991 kumin Tonzang gam Phaisat khua ah crusade bawlin va pai a, dawi bia inn khatah lutin a monu uh nattun khuasik a ling keuhkeuh khat thungetsak hi. Thu a ngetsak bek tham loin pusa pasa dawi leh kau khempeuh zong hawlkhiatsak hi. Tua laitakin inntekpi hong pai-in Evan. Langh Do Khup inn sung panin innka ah, innka panin inntual ah sawn khia hi. Inn sunga a thunget pen inntual ah Amen pia thei pan hi. A monu in thunget a deih hangin a teknu in kithoih nading dawi biakna tui lui khin ahih manin a heh lua ahi hi. Tua pitek in siampute samin aklui khat tawh a pusa a pasa teng uh sam kiksak hi.

Tua zawh kum 14 khit ciangin Evan. Langh Do Khup tungah tua piteknu tupa (A tapa upen gamluah ding pen ii tapa) in Vok tul li khat goin Evan. Langh Do Khup tungah a pi’ tangin mawhsutna nei hi. “Ka pi in nang hong hawlkhiat khit a kipan kamsiatna lianpi ka inn sung uah hong tung hi. Thu na ngetsak ka nu lah hong si-in a sawt loin ka pa zong hong si sawnsawn hi.Tua bek tham loin ka sanggamte zong hong si si mawk ahih manin inngamh dek petmah ka hi ta uh hi. Pasian leh nang tungah mawhsut thei dingin ko nupa bek a om lai ka hi uh hi. Nangma tenna Kawlpi (Kalaymyo) ah lah hong pai zolo ka hih manun Kansau khawk ah nong ciah laitak lem pen ding ci a hong pai hi ung, Sia aw ih biak Pasian kiangah mawhmaina hong ngetsak in” ci in thum uh hi. Evan. Langh Do Khup in “Ken tua thu phawkin ka nei nawn kei a, tua hun lai-in zong hehna thangpaihna in ka nei kei hi. Ahih hangin Topa lungkimlo ahih khak leh thungen ve ni ee maw” ci-in mawhmai nading cidam nadingin thupha pia-in Pasian kiangah thungetsak hi.

Tua ni zingsang mahin Khuaivum khua mi Pa Tawng Za Lam a kici khat zong mawhsutin hong pai hi. 1991 kumin amau khua ah Evan. Langh Do Khup a pai lai-in Pa Tawng Za Lam pen Kha Siangtho nasepna a nial pha mahmah khat hi a, Evan. Langh Do Khup vua nuamin a diangdiang khat ahi hi. Amah pen kungfu khawng zong a siam khat ahi hi.

India galkap va tumin India gam tawng lamah va om hi. A lawmte tawh gamkuanin a om laitakun Khuaivum Tuiphum biakinn sunga Evan. Langh Do Khup’ thugente a bilkha ah ging kik mawk hi. A lawmte kiangah “Tu a thu kigen la kisate na za uh hiam?” a cih zel ciangin a lawmte lah a za om lo hi. Tua bangin a om ciangin galkapte in mi hai-in ciamteh uh ahih manin galkap sung pan zato pension tawh tawpsak uh hi. Galkap zato leh Civil zato tuamtuam ah a kilah hangin dam thei tuan lo hi. A tawpna ah Pasian mizat thungente tawh na kituak kha a, tua lai panin Pasian Kha Siangtho ngahin piangthak hi.

Amah zong Evan. Langh Do Khup kiangah hong pai-in “Nang kong simmawhna pen Pasian a lungkim lo ahih manin ka sepna khempeuh ah daupaina tuahphatna ka nei thei kei hi, ka mawhmai nadingin thu hong ngetsak in la, thupha hong pia in” ci-in khutdinin khitui taak keuhkeuhin Pasian kiangah ki-apin thungen a, Evan. Langh Do Khup in limtakin thupha pia-in Pasian kiangah thungetsak hi.

Hih Kansau khawk Crusade manin Kalaymyo a ciah ciangin zong mawhsutna khat hong om leuleu hi. Evan. Langh Do Khup leh a lawmte in Tedim gam Vongmual khua ah crusade abawl lai un tua khua ah Christian a suak nailo biakna tuamtuam tam ahih manin Jesu thu zadah mahmah uh hi. Nitak khat kikhop man phetin temta tawi papi la nih biakinn sungah hong lut a, Evan. Langh Do Khup tawng gawp, vau gawp uh hi. Tua bek tham loin biakinn pua lam a tun uh ciangin zong tangval hon khatin singkhuah suangtum manin vau gawp leuleu uh hi.

Tua bang thu teng hangin amau khua ah tuahsiatna tuamtuam tampi om ahih manin piangthak nupi la Sangsia sem kimlai khat a ta-ngek pua liangin Evan. Langh Do Khupte’ innah hong pai hi. “Sia aw, nang kong simmawhna uh hangin kamsiatna tuamtuam tuak ka hih manun ka khuabup uh aitangin mawhsut a hong pai hing” ci-in Evan. Langh Do Khup tungah puanza blanket khat pia hi. Siapa in “Ken no tungah bangmah khasiatna ka nei kei hi, ahih hangin ih biak Pasian lungkim lo ahih khak leh thungen ve ni maw” ci-in tua nu’ lu tungah khutngain thungetsak hi. Hih 2005 kum pen mawh sutna tam ahih manin Siapa in lamdang asak mahmah kum khat ahi hi. Hih bangin Pasian nasemte a simmawhte tungah samsiatna a tun hamtangna thute gen ni cileng tampi tak om a, ahih hangin gentuak lo thu ahih manin mawh hong sut teng bek ih gen ahi hi.

E. Alamdang misi thohkikna
1994 kum in Evan. Lang Do Khup leh a teamte in Tedim gam Laamzang khua-ah crusade va bawl uh hi. Evan. Langh Do Khup kiangah Numei khat hong pai-in “Sia aw manlangin hong pai un ka nu si dektak hi,” va ci mawk hi. A lawmpa Sia Khen (Thang Khan Khen) tawh zuipah uh hi. Cinanu si dingin na laitat ta a, a tu atate na kap ngengngang ta uh hi. “Kap kei un na nu uh silo ding hi,” Evan.LanghDo Khup in acih leh a kapteng hong daiduak in the betkhiat hong bang liang hi.

Deihtak in thu a ngetsak uh leh a thunget uh sawtlua kha ahih manin, “Amen” a cih uh ciangin tua cina na sikhin mawk hi. A tu ata teng kap ngengngang leuleu uh a, “Nu aw, Siapa in silo ding a cihsa hilo maw?” ci-in kahtam lo ngelhngelh mawk uh hi. Evan.LanghDo Khup’ kampau pen kahtamlawhna hong suak mawk hi.Tanute in inndeina teng phelkhia uh a, inn sungah pheek phah ta uh hi. Veng leh pam in zong delh ciat uh ahih manin inn sungah mi dimpah ngeingai hi.

Tualai takin Evan. LanghDo Khup leh Sia Khen in Topa nakpi takin kunh uh a, Misi kiang a kap teng paikhiasakin tua misi nu’ khut len gige uh hi. “Topa aw, hih nupinu anuntakna hong pia kik in, nuntakna na piakkik masiah ka khah kei ding uh hi” ci-in thungen uh hi. Kamtuampau bekbek tawh sawtvei khopkhat thungetna a neih khit uh ciangin Topa in hehpih ahih manin nupinu hong hing kik takpi hi. “Tua hun laitak a, ka lungdamna leh ka angtannate ka pulak nop hangin ka gensiamna in cin lo a, ka gelh siamna in zong cinlo hi,” ci-in Evan.Langh Do Khup in gen thei zel hi.

1994 kum a thupiang hi a, 2000 kum in U Rev. Cin Za Mung (Evan. Langh Do Khup’ upa) in crusade a va bawl ciangin sa na gawhin ankuang na umpih uh a, “Sia aw, unau pen ko innkuan adingin Topa in hong zang hi,” ci-in lungdam na ko lai hi.

F. Sermon omlo khanlawhna
1. Lamzang khua ah
1994 kum in Tedim gam Lamzang khua ah Campaign Evan. Langh Do Khup in va bawl a, “Na hi bangbang un camp hong lut un, na zuthawl mah hong keng unla, na khamtheih zatuite mah uh hong keng lel un,” ci-in khangnote zol hi. A nitak masa ni bang khangnote in zatui leh zu khamthei lua uh ahih manin pawlkhat in lupsain thungai uh a, pawlkhat in ihmut san ziau lel uh hi.

Khanlawhna a pian nadingin Evan. Langh Do Khup in a lawmte tawh nakpitakin thungen den uh a, nitak khat Pasian phatna nasiatakin neihpih uh hi.Tua nitak pen guah tampitak zu ciciat hi. A hih hang Pasian phatna khawl tuanlo uh ahih manun camp phualpi pen buan nawi gawp liang hi. Pasian minphatna nasia luain numeino pawlkhat bang kilimkhuk gawp uh a, a sam tung uah buan gah niuniau mai hi.

Evan. Langh Do Khup in amaute adingin Jesu itna thu apulak kawmin a khitui luang luang hi. Gim mahmah ta ahih manin a veina zahin thu gen zo nawnlo hi. Tua laitak in mipilak panin numeino khat hong pai vingveng a, Evan. Langh Do Khup ngawng-ah luai-in hong kap hi. Evan. Langh Do Khup in kilawmsa hetlo ahih manin “Topa deihna bang ai tam maw?” ci-in lungngai hi. Tua laitak inTopa Khasiangtho in, “Nang gim lua nahih manin na tha hong khek ding hi,” ci-in Evan. Langh Do Khup theisak hi. Evan. Langh Do Khup in zong tua numeino’ lu tungah khut nga-in, “Topa Pasian in na khua uh khanlawh nadingin nang hong zang ta hen,” ci-in thupha pia hi.

Tua khit phetin tua numeino mipi lamah kihei pah vingveng a, mite thu ngetsak kawikawi hi. A lawn khak peuhpeuh in a mawhna uh pulakin kap ziahziah uh hi. Bangmah gen hetlo napi alawnkhak peuhpeuh amawhna uh kisikin kap uh a, gupkhiatna ngahin Topa Khasiangtho ngah pahpah uh hi. A neu a lian, nupi papi leilak ah khukdinin Topa tuangah ki-ap pah ziahziah uh a, khat leh khat a mawhna uh kipulakin kimaisak ciat uh hi. Tua nitak a Topa kha in na a sepna thu ih gelh nadingin ih siamna in cinlo banah ih kammal in zong cin zoloin ih lai in zong gelh khin thei lo liang hi.

2. Muallum khua ah
Tedim gam Muallum khua khanlawhna zong a lamdang khanlawhna khat ahi hi. Hih Muallum khanlawh dan pen mundang tawh kibang loin sermon omlo crusade ahi hi. Phatna leh biakna tawh khanlawhna nasiatakin piang hi. Nitak kikhop ciangin Pasian phatin lam ziahziah uh a, kha khanlawhna piang pahpah hi. Hun kipat nading a mipi thungetna panin khanlawhna piangzel ahih manin thugen ding hun om man nawnlo zel hi. Sun thusinna hun ciangin gen ding leh hilh ding teng limtakin Evan. Langh Do Khup in hilh hi.

Khanlawhna pen Khitui Gospel teamte ciah khit ciangin zong nasia semsem lai hi. Biakinn ah thungen a giak mi tampi om a, biakinn ah thungen kitalawi lo hi. Kum thak ni khatin dawi siampupa khualak vak a ciah leh biakinn huang sung tawn kha hi. Biakinn huang sung a sik ciangin Topa’ Khasiangtho in na man lian hi. Inn a tun ciangin a lup leh ihmu theivetlo ahih manin biakinn ah paikik a, Nikodemas bangin zankimpi-in va ki-ap a, Tapidaw suak pah lian hi. Hih zah dongin Kha Siangtho nasepna om hi. A lamdang khanlawhna khua khat ahi hi.

*A BAN EVAN. KHUP NASEPNA NIHNA AH OM HI*