TEARS GOSPEL OFFICE HONNA LEH STUDIO HONNA

Khitui Gospel Nasepna pen pawlpi khat peuhpeuh bulphuh a kikalsuan hi lo ahih manin sawm a khat cih bang om lo hi. Nipi sumpi don cihte zong om lo hi. Crusade a kibawlna munte nangawn ah inntekte ading lobuang sumpi kidong ngam ngeilo hi. Tua ahih manin Khitui Gospel Team ah fund om ngeilo hi. Mission nasepna lamah mite lawpzaw ahih manin mission adingin bel fund kinei zel zaw hi. Tua hi a, zum inn khat ih deih mahmah hangin kinei zolo den hi.

Pasian in hong hehpih tawh Khitui Gospel Nasepna kum 20 a cin ciangin zum inn (Office) leh lakhumna (Studio) kinei zo pan hi. Pasian tanu Huaino in Topa’ sawlna tawh hong lamsak hi. That nih hong lamsak hi a, a nuai lamah studio a tung lamah zum inn dingin kizang ding hi.

Hih inn sung panin Mission Nasepna, Crusade nasepna, Lai nasepna, Video nasepna, Audio nasepna tuamtuamte kisem to ziahziah ding hi ta hi. Pasian minphatna music hoihte, la hoih nonote hong piang khia ding hi.

1.1.’11, 1:1:1 PM lian in honna keinei hi. 1 bekbek 7 a phak laitakin Rev. Hau Go Kham (Emmanuel Baptist Church) in a Siampi puan silhin Zuminn leh Studio honna khau atsatna nei hi. Tua khit ciangin Zum kongpi leh Studio kongpite honna nei a, mipite tawh Vanglian Pasian tungah apna nei khawmin a tawpna ah kipsakna Rev. Hau Go Kham in kammal vanglian kilawm tawh Pa Pasian tungah apna nei hi.

1 bekbek 7 laitakin a hon nopna thu pen Evan. Langh Do Khup in hih bangin gen hi. “1.1.1991 kumin Singgialte khua khungah Singlamteh phutin Pasian tungah khitui tampi luangin ka thungetnate Pasian in hong za a, lawhcinna tampi pia hi. Tu in kum 20 hong cing ta a, 1bekbek 4 a phak laitak a ka thungetna pen 1 bekbek 7 a phak ni in lungdamna hong kosak hi,” ci-in teci pang hi.

Khitui Gospel Video Nungak tegel ahi, Ngaih Anglai Cingno (San) leh SianAnglai Ah Cingno (Nuam) in inn hon nading pakkhau tawi uh a, Zo ngeina puan kilawm mahmah tawh kizem uh ahih manin Zomite hong lamto Pasian ahihna kilangsak mahmah uh hi. Phaitam lam Zum leh Studio honna a a kiman a kiman khit ciangin Khitui Gospel Home inntual ah biakpiakna hunpi kizang leuleu hi. Pawlpi panin Pastorte upa makaite hong pai kim thei uh hi.

Khitui Gospel Zum leh Studio hong lamsak ahi, Huaino in Khitui Gospel Teamte a laikhak Emmanuel Pastor khat ahi, Lia Ngaih Lun in mipi mai leh a nungta Pasian mai ah sim khiatna nei a, Pasian adingin kiniamkhiatna tawh a neihsa tampi a pia khia Pasian tanu laigelhte mipite in lamdang leh thupisakna tawh dai dide in ngai uh hi.