ZO DAMTUI PIAKNA

Pasian in Khitui Gospel Mission Nasepna thupha hong pia a, kum khat sangin kum khat a tangzaizaw nasep hong guan toto hi. 2001 kumin nikten puansilh 1500 val ih va puak a, a kisam taktakte tungah ih hawmkhia thei hi.

2002 kum ciangin Pasian hong hehpihna tawh missionary ih puak thei ta a,. Khitui Gospel Missionaryte’ nasepna tungtawnin Khristian hong suak thak tampi om uh hi. Tu ni dong mission nasepna kizom toto thei lai hi.

Tu ciangciang namdangte sum kizang nai lo a, Pasian a it Zomi kipawlna tuamtuam leh mimal panin nong huhna uh tawh kisem toto thei suak hi. Pasian thu tawh ih pattah banah leitung nuntak khuasak zia ding zong ih pantah toto hi. Kanpalet gam pen an tam piang lo ahih manin nuntak khuasak hamsa mahmah a, sum leh paii hau zong tawm mahmah hi. Tate sang kahsak zolo tampi om uh a, Sum leh paii haksat luat manin biakna nangawn a nusia bang om ta mawk uh hi.

Hih Phakawn khua pen ih missionary Sia Khai Cin Kap omna hi a, Kanpalet paina mawtaw lam lian kim a teng uh hi a, mualsang ahih manin tui haksa mahmah hi. Ih missionary Rev. Kui Thang tenna khua hi a, Rev.Kui Thang pen amau khua ah omsak loin, Saw Myo ah ih puak zaw hi.

Pakawn khua ah tui pia dingin ih mission director pa Sia Pauno (Kham Sian Pau) Kawlpi pan Kanpalet dong cycle tawh va pai hi. Mawtaw sap tam ahih manin Mission sum phatuam ding cihna tawh gim leh tawl thuakin a va pai ahi hi. Pakawn khuazang buppi zong na lawp mahmah uh a, thu um lote nangawnin lawptakin nasem uh hi.

Tua khua ah huan bawl a om Kawl mihaupa Mya Maung kici khat om a, tua mihaupa bangin tha ngah mahmah ahih manin bank pan sum khak a tun ma kikal a kisam van lei nadingin ama sum na zangsak ziahziah hi. “Sepna tawh upna lak in” cih la ih sak mah bangin gamtatna tawh Pasian itna ih lahkhiat theih ciangin ih thu gente hong sang thei pan uh hi.

Pasian in ompih ahih manin upmawhna sangin nasep matelhzaw uh a, lungkim huai takin hong zo siang thei uh hi. Naupangte bang kisil pah ziahziah uh ahih manin tha ngah huai mahmah hi. Sianthona a om nadingin tui tampi a om ding kisam a, cidamna a om nadingin zong tui siangtho kisam mahmah hi.

Topa Jesu in a piak NUNTAKNA TUI a dawn khit uh ciangin Topa kiang pan manin leitung tui siangtho zong dawn kha lailai uh hi. Ni khat ni ciangin amau zong ei mah bangin missionaryte hong suak ding uh a, mun tampi, khua tampi ah huhna a pia khia ziahziahte hong suah ding uh ih lametna leh ih thungetna ahi hi.

Biakinn leh Sanginn ah zong hih bangin tuilu khat tuak kitungsak hi. Kanpalette in Pasian upna a neih ma hun lai un, a inn uah tui tungsak ngam lo uh hi. Ei lam danin sialkop go a, a tongte bekin a innka uah gua tuizawl tawh tui la ngam bek uh hi. Inn ah tui nuamtak a zat theih nadingin Sial nih peuhmah gawh loh phamawh hi mawk hi. Pasian bawlsa tui nangawn lungnuam takin zang ngam lo uh hi.

Hih tuipiakna sum leh paii bei khempeuh ih sanggam it mahmah Pasian tanu khat in hong sik hi a, ahih hangin aman a min gelh ding phal lo hi. Pasian ciaptehna ah kicing takin om khin hi. Nang zong Pasian Kha Siangtho in Khitui Gospel Team tawh mapang khawm dingin hong sawl khak leh nong piak sum leh paiite hih bangin ka na zang ding uh a, a lawhcinna hih website ah kong suaksak zel ding uh hi.