MISSION KA LUNGTANG

Topa adingin galphual ah hangsan takin gal ka do nop laitakin ih galpa Satan in nakpi takin hong bawlsia hi. 2005 kumin Japante zatopi khat ah ka Sinkha ka la khia hi. Tua hun a kipan mission phualpi ah ka pai zo nawn kei hi. 2006 kum sung bekbek ah thum vei tak zato ka lum hi. Cikciangin ka khe tawh mission phualpi ka tuan zo kik tam maw, ci in Topa hong piak hatna ka ngak niloh hi. 2009 November kha ciangin Pasian in tha hatna hong guan kik hi. Halleluijah! Mission phualpi ah missionaryte tawh ka kimu a, nuam ka sa mahmah hi. Amau zong hong it mahmah uh a, missionaryte in lungdamkohna ankuang hong um pih ciat uh hi. Kanpalet Township Baptist Association (K.T.B.A)te in zong sa luang khat go-in ankuang hong um pih uh hi. Pasian hong itna lamdang ka sa mahmah hi. Pasian a it mahmah ka lawmpa khat in hong piak sum leh paiite tawh antang ip 125 ka lei uh a, mission phualpi ah ka va hawm khia uh hi. Kanpalet khuapi sangin khuatate ah ka hawm zaw uh a, Christian ahi khin sate sangin dawi bia laite ka tam piak zaw uh hi. Topa Jesu itna mu uh ahih manin nuam thei mahmah uh hi. Ih galpa Dawi mangpa in bangzah takin hong do ta leh ih Kumpipa leh ih Galkap Mangpipa Topa Jesu in gualzawhna hong piakna lahkhiat nadingin Zogam a mualsang penpen, Kawlgam bup ah a sang nihna ahi, Victoria mualdawn ah ka khe tawh ka va kahto zo ta hi. Mission phualpi ah ka pai kik zawh pen ka lungdam mahmah a, amau ngeina puante silhin ka om ciangin ka lungkim mahmah hi. Ka tanu Lia Kimbawi in hong zui a, a pa’ nasepna a mit tawh mu hi. A Topa Pasian leh a pa’ lungkimna ahi hi. “Pianna Zogam aw, cikciangin nang hong ngilh zo ding a, cikciangin hong taisan zo ding ka hi hiam? nang in kei nong ngai a, kei zong nang kong ngai lua hi. Eitegel pen Sihna lobuangin hong khen kei ta hen. Sianmang ka Zuapa, Zogam ka Tunnu, Mission ka Lungtang”