TAULENG KHUA KHANLAWHNA LAMDANG

Khitui Gospel Team in Motor Cycle a zang tuailai khangnote a pianthak nading uh deihsakna tawh A (1)VEINA KHITUI GOSPEL MOTOR CYCLE CAMPAIGN bawl uh a, Buanli leh  Tauleng khua ah kibusa uh hi. Tauleng khua zangin na lunggulh mahmah uh ahih manin Pawlpi vai-in hawm loin khuathawng vai-in hawm liang uh a, hausa upate in vaihawm uh hi.

Tauleng khuazang buppi min tawh Gospelte Bawng khat gawh giap uh hi. Gospelte om sung khempeuh Kikhopna pen Tuiphum biakinn zang khawm uh a, AG biakinn huang sungah Motor Cycle teng koih uh hi. ZBCM, AG, RC om uh a,  ahih hangin pawlpi kideidan vet lo uh hi. Nipini nangawn amau biakinnte ah kikhawm loin ZBCM biakinn ah khuazang buppi in hong kikhawm zihziah uh hi. Sun in Pasian thu sinna, nitakin Biakpiakna kinei den a, nisimin Kha Siangtho khanlawhna lianpi hong piang den hi. Biakinn sualpekte kawt zo liangin khitui naptui tawh Pasian maipha zong ciat uh hi.

Hih Crusade ah khanlawhna lian mahmah ahih manin a lamdang thu khat hong piang hi. Pasian tung a mawh sutna bek tawh kilungkim zo nawn loin leitung pasian ahi, Nu leh Pa, Teknu Tekpa, Pastorte, Hausate tungah mipi in mawh sutin amau Nu amau Pa, amau Teknu Tekpa ciat ngawngah luai-in mawh sut uh hi. Hih thu a thei kha a mu kha khempeuh lungdamna tawh nakngek na-in khitui luang lo kuamah om lo hi.

Khitui Gospel Team in kum 21 sung Zogam ah a tangko uh Lungdamna thu sungah Nu leh Pa, Pastorte, Makaite zahtak ding it ding cih pen a tangko mahmah uh thu khat hi a, innkuan tampi leh pawlpi tampi in phattuam lawh mahmah uh hi. Nu leh Pa neihsa a ne tum khangno tampi a pianthak manin tu in Nu vak Pa vakin om thei ta uh hi. Leitung pilna lam leh Lai Siangtho lam panin degree sangpipi a ngah khin khangno tampi hong om banah Siavuan leh kumpi nasem khangno tampi hong piang khia hi. Khangno sumbawl hau leh gamdang tungin Nu leh Pa sum a khak ziahziah khangno tampi hong om ta hi. Hun khat lai a amangthang sa tuailai khangnote ahi uh hi. Zogam khanlawhna gah ih nene ta hi, Pasian minthang semsem ta hen.

Nipini zingsang biakpiakna ah ZBCM, AG, RC hih pawlpi thum panin Pastor tengin pulpit luah khawm uh a, Khitui Gospelte adingin piakkhiatna bawl uh hi. RC Siapa in makaihin thugen siam leh deihsakna lian lua ahih manin kikhawmte puansilh loin koih zo hi. Sum tang zong tampi ki ngah hi. Mipite in lungdamna leh veina khitui tawh a piakkhiatna uh amuh uh ciangin Khitui Gospelte in sang ngam lo tang ngam loin Khitui Gospel Mission phualpi Kanpalet ah ka na puak ding uh hi, ci-in makaipa in tangko khia hi. 2011 May 12 pan 15 ni ciang Crusade hunin kizang a, Tauleng khuazang in hong lunggulh mahmah lai uh hi ta leh Topa sungah ki it, kingaihna khitui mah tawh mangpha kikhak phot hi.