2012 AH PASIAN LEH ZOMITE ADINGIN BANG IH SEM DING HIAM?

Huih leh guah ngakin khuahun hoih dong a ngak mi in khaici tuh ngeilo ding a, an zong la ngeilo ding hi. (Thuhilhna 11:4) (Ecclesiastes 11:4)

Hunhoih hunsia cih khen tuanloin Pasian’ thu hilh ding na kin ngaihsutna ding, lungduaina tawh mite’ lungsim zo-in, mite taii-in, hanthawnin na hilhna dingin thu a hong pia ka hi hi. (Timoti Nihna 4:2)

Hih a tung a Lai Siangtho mun nihte in Pasian’ na kin takin ih sep ding hong sawl hi. Zomi Pasian thu umte in Topa na ih sem nuam ciat hi. Ahi zongin ih hauh ding, ih pil ding, a hun lem ding ih ngakngak nalamin hunin hong khengkheng a, Topa adingin bangmah sem man loin hun leh ni in lenmual hong khup san zel hi. Bangmah sem loin kum hong thak toto hi.

“Huih leh guah ngakin khuahun hoih dong a ngak mi in khaici tuh ngeilo ding a, an zong la ngeilo ding hi.”  ci ahih manin tuni a ih dinmun penpen tawh Topa Pasian adingin ma ih pan pah ding ahi hi.

  1. Na hat leh tam sep ding
  2. Na hauh leh tam piak ding
  3. Na pil leh tam hilh ding

tua mah bangin

  1. Na thanem leh tawm sep ding
  2. Na zawn leh tawm piak ding
  3. Na hai leh tawm hilh ding

Tu laitak na dinmun zui-in sem hamtang dingin kiging lecin Pasian in na ma hong vangsak ding hi.

“Hunhoih hunsia cih khen tuanloin Pasian’ thu hilh ding na kin ngaihsutna ding, lungduaina tawh mite’ lungsim zo-in, mite taii-in, hanthawnin na hilhna dingin thu a hong pia ka hi hi.”  ci ahih manin na dang khempeuh sangin Pasian thu hilh ding pen a thupi penin ih koih ciat ding ahi hi. A omsa pawlpite Pasian deihna tawh kituakin a gamtat a luhek theih nadingun CRUSADE bawlin Pasian thu ih hilh ding a, Pawlpi cih bang a om nai lohna mun ah MISSION nasep semin kha mangthang ih man ding hi.  “Kei lem nai keng” cici kei in. 2013 hong tung pah ding a, na kum zong hong tam semsem ding hi. Topa adingin bangmah sem loin kum khat hun hong mawk bei zel ding hi. “Khai na tuh kei leh an la ngei lo ding” ci mawk hi.

2012 KUM THAK NA BANG CI ZAT SAWM HIAM?

Khuata mipa

Evan. Langh Do Khup