HAICIIN CRUSADE LEH MAWTAW ACCIDENT

Haiciin khua ah crusade bawl dingin Tedim Lawibual veng a teng, Khitui Gospel Teamte zinpipa Sian Lian mawtaw tawh 2012 February 28 ni in Kawlpi khua Khitui Gospel Innpi panin ka ding khia uh hi. Zampi gamah guah hong tam lua mahmah ahih manin lampi nal mahmah a Pasian in hong kem ahih manin tuahsiatna tawh hong kipelhsak hi. Guah tampi lua ahih manin Gospel pai khempeuh akno tuikia bangin kawt kim ngipngiap in Dr. Khual (Dr.Rev. Gin Khan Khual) innpi ka tung uh hi. Dr.Khual’ naupa Khai leh a lawmnu in limtakin zin hong do uh a, sumtawng ah meiphualpi hong cihsak uh a, Gospel tengin meiphualpi awi in amau zingsang an hong huansak uh hi. Haiciin lam pen lampi neu mahmah banah mawtaw gol pai ngei nai lo ahih manin Dyna tawh pai ding hong awi lo ciat uh hi. Mawtaw neipa in Pasian muanna tawh pai teitei ding ci, ahih manin ka pai suak veve uh hi.

lolai ah mawtaw

Lam tawntung ah hong tonpih Topa Pasian hehpihna hangin Zogam khuapi khat ahi Haiciin khua cidam takin nitak nai 7:00 in ka tung zo uh a, tumging leh aw liatna teng thuah mengmengin nitak kikhop nuamtakin ka zang thei pah uh hi. Topa Pasian in kha khanlawhna hong kipansak pah hi.

khup leh niang

Tutung Haiciin crusade adingin inntekpi a sem Khup leh Niang hi a, amau Haiciin khua tualsuak ahi uh hi. Pasian in gam minthang USA ah a tunpih ciangin a khua a tuite in Pasian a muh ding deihsak lua uh ahih manin sum leh pai tampi bei-in crusade bawl uh hi. Pasian in amau nupa thupha hong piaksak ta hen.

Gospel team

HAICIIN CRUSADE A KIHEL THEI KHITUI GOSPEL TEAM TENG Anung lam vei pan ziat; (1) Pum Thang (2) En Thawn (3) Nunu (Sian Lian tanu) (4) Cingpi (Sia Thawn’ tanu) (5) San Nuam (6) Kimbawi (Sia Do Khup’ tanu) (7) V.C Mang (8) Sian Lian (Mawtaw neipa) Amai gual; (1) Lian (2) Sia Thawn (Lamzang ZBCM Pastor) (3) Sia Do Khup (4) David Tuang (Sia Do Khup’ tapa) (5) Thang Khen (Lamka CBA upa)

Haiciin khua

Lampi neu in a khanglam keen thei mahmah sawnsawn ahih manin lau huai mahmah hi. Haiciin khua ah leitung pian zawh Dyna a lut cil hi a, tuahsiat theih nading mun tam mahmah hi ta se leh mawtaw neipa Sian Lian in Pasian leh Zogam adingin a mawtaw itsik het loin hong zangsak a, amah mahin lauhuaina tampi kawmkal ah lungduai takin hawl hiat-hiat lel hi. Mawtaw saap hong la ngei lo bek tham loin Tedim ah Khitui Gospel Teamte limtakin zin hong dou tawntung uh hi.

Kimnu kiapna

Tuailai khangnote in Topa Jesu itna a tel uh ciangin a mawhna khempeuh a maisak Pa tungah lungdam lua-in nau kahin kap khia liang uh hi.

Mawtaw kia pen

Mawtaw pen lampi panin saupi kikhuk suk hi mah ta se leh sih nading lauhuaina panin Pasian in a mite kem hi. A liam pawl khat a om tei hangin luang beina liang om lo hi. Khut tawng khe tawng liang zong om lo hi. Nitak biakpiakna nuam takin kizang thei veve hi. Tawp nitak dongin gupkhiatna ngah mi kibehlap tawntung hi.

Mawtaw liamte

March ni 4 ni nipini in Tualkhiangte naupang 3 mang ahih manin a zonpih dingin Haiciin khua panin mi pawl khat va pai uh hi. Hong ciah lam uh ciangin a tuanna uh mawtaw lam khangah kia in mi tampi liam uh hi. A phadawm zawdeuh teng Siksakol manlang tawh Haiciin lam ah pua uh a, a liampha zato puak kul teng Mawtaw neipa U Sian Lian thusiamna tawh Gospel ten Suangdai khua khen India mawtaw omna dong va kha uh hi.

Mipi kiapna

Naupangnote tungah zong Pasian Kha Siangtho hong tung ahih manin kap kawmin thungen uh a, a mawh khempeuh uh a puakkhiatsak Pa Topa Jesu tungah lungdamna khitui tawh lungdamna ko ciat uh hi.

Mipi kiapna

Khangno tampitak kikhel uh a, khamtheih guihtheih khempeuh paisanin Topa Pasian deihna bangin ka gamta ta ding hi, ci in kiciamna khut lamto uh hi. A tek pen pan a moi pen dongin Pasian Kha Siangtho nasepna sungah kihel ciat uh a, lungdamna tawh kidim ciat uh hi.

Mipi kiapna sunhun

Nisimin Topa Kha Siangtho in na sem den ahih manin mi tampitakin a mawhnate uh pulakin khitui naptui tawh Topa Jesu kiang zuan thei uh hi.

7 Responses to “HAICIIN CRUSADE LEH MAWTAW ACCIDENT”

  • sia do khup aw mi pih te a ding a pasian tung ah na na sep sak na te ka muh ciang ka lung kim in ka ci mul bang ong tho sak hi mai lam ah na ma ban ding tam pi tak a om lai te ah Topa pasian in tua sang a pi cing zaw ding in ong phung vuh lai ta hen ci in na na sep na te ka muh ciang in lung dam pih na lai kong at hi. lung dam

    from-malaysia

    • Mr. Thanglek leh John Thang nong tha piaknate uh hangin lungdam mahmah ing, Laizom Zomite in thu nong ngetsakna uh leh sum leh paii, neihsa lamsa, tha leh ngal tawh nong panpih ciat manun Khitui Gospel Nasepna tu ciangciang kum 22 Zogam ah kalsuan toto thei hi.

  • Haiciin Crusade thu kanasim kha a thakangah mahmah hi. Haiciin khualampi neu mahmah ah DYNA lutsak a ahawl u SianLian zong siam le hong kem Pasian hoih kasa hi. Donghtuahna thu ah zong luangleban supna om lo pen Pasian thupha taktak hi.
    Haiciin khua 1894 kum in kisat a tu in kum 118 upa khuapi khat a hi hi. Tu tung Crusade hang in Pasian in Haicinnkhua thupha ong pia semsem ta hen la mipil, misiam ki beh lap in khantohna tawh Pasian le minam a ding thupha ong suak den ta hen. Crusade a ding donor te zong thupi mahmah le etteh huai kasa hi… Pu Khup le Khitui gospel Topa le minam a ding khansawtle muibun den ta hen Amen
    From Dalmung Guite( Haiciinsuan )

    • Lungdam mahmah ung ei Mungte innkuan, na nu leh na pa’ pianna khua ah khanlawhna a pian nadingin Pasian in Khitui Gospel Team hong zat khak pen ko zong hampha kisa ungh. 1994 kumin ni 17 bang tam a Crusade ka bawl ngeina khua khat hi a, tua hun lai a naungekte tun nungak tangval na hi ta uh hi. Hih bangin ih nasepnate leitung bup pan ih et theih nadingin 2012 website man nong piaksakna uh ii lawhcinna khat hi pah hi. Pasian nopna no innkuan sungah hong om den ta hen.

      Hong it, Pu Khup

  • Sia Do Khup aw, na lai at te leh na Photo suah te ka na mu hi,nakpi in ka lung ong khoih a, thangah huai mah2 leh tha lawp huai na sep na te ngen hi cih kamuh man in, na ma ban dingkhempeuh ah zong Topa in,ongkithuahpih tawntung ta hen cih thuphalianpi kongtut hi. ka pianna Haiciin,ka ten na Haiciin mah pen kumsawm( 10 )sungka muh loh leh ka zak khak ngei loh ka up mawh ngam loh thu tampi nang tung pan leh na na sep na te uh tung pan in,na mu thei ka hih man in,nak pi in ka lungdam na kongko hi.Kei ongdeihsak theih a piang thei ding a hih nak leh Topa in, ” Jacob kahleipi nangma Innsung ah dawhta hen” cih kongdeihsak na lianpen ahihi…
    Pauhaiciin,
    Kl,Dawihavangkal

  • Sia khup aw, ka pianna uh Haiciin leitang ah Pasian leh Mipihte na itna hangun nisa guahlak dailak ah pilna siamna neihsa lamsa itsit hetlo a nasepna uh ka na muh uh teh gualzawhna hong pia i biak Pasian tung leh Khitui Gospelte tungah lungdamna lianpi kong ko uh hi. Haiciin crusade thungetna tawh hong panpih mimal kim Topa in thupha hong pia ta hen. Haiciin khua Kha khanlawhna hangin mimal kim nuntakna ah I Pasian hong itna leh hong hehpihna thupha guah bangin hong zu ta hen. Mai lamah Khitui Gospelte I biak Pasian in ama min thannading leh ama gamtangzai semsem nadingin hong zang sem2 ta hen.

    Lungdam,
    Khup leh Niang

  • Dear Sia Khup le ATeamteng
    Pasian hong huhna leh note hong thungetsakna tawh Haiciin khuapih teng in hoih lam kimanawh ta hi cih kong zasak hi. Lamka Zatopi ah a om mimal 5 lakah khat bek om lai aa, tua pen Khua Hausapa Thangkhanmang hi. Adang teng pen Pasian hoihna hangin tuak vek ta uh hi. Tua bek loin note le Pasian hoihna hang mah tawh Haiciin khua sungah thu sia om lo ahih manin Pasian min ka phat hi. Pasian in Pawlpi zong thupha hong pia in Khitui Gospel Teamte le Khupte nupa hanciamna tungtawnin khua sungah nakpi takin khanlawhna om hi cih hong zasak ingh. Haiciin Tuiphum Pawlpi adingin mailam ah ka ngiim uh Biakinnpi lam nading ah zong thungetna hong na neihsak lai un. Lungdam mahmah ungh. Note tawh Khrih sungah…..Pastor Singpu (Haiciin)

Leave a Reply..