Tua hi a, USA leh leitung mun tuamtuam a om Zomi u leh nau KHITUI GOSPEL VIDEO NASEPNA tha hong pia lawmte tungah huhna khat kong ngen uh hi. No omna khua leh state ciat ah ZOTAWI LIANU DVD hong zuaksak ding mi muan ka kisam mahmah uh hi. KHITUI GOSPEL VIDEO NASEPNA nong huhna tawh nong zuaksak zawh ding leh na min leh address khituigospel@gmail.com ah nong khak nadingin ih Topa Jesu min tawh kong thum uh hi.

KHITUI GOSPEL VIDEO NASEPNA aitangin;

Evan. Langh Do Khup

Haiciin khua ah crusade bawl dingin Tedim Lawibual veng a teng, Khitui Gospel Teamte zinpipa Sian Lian mawtaw tawh 2012 February 28 ni in Kawlpi khua Khitui Gospel Innpi panin ka ding khia uh hi. Zampi gamah guah hong tam lua mahmah ahih manin lampi nal mahmah a Pasian in hong kem ahih manin tuahsiatna tawh hong kipelhsak hi. Guah tampi lua ahih manin Gospel pai khempeuh akno tuikia bangin kawt kim ngipngiap in Dr. Khual (Dr.Rev. Gin Khan Khual) innpi ka tung uh hi. Dr.Khual’ naupa Khai leh a lawmnu in limtakin zin hong do uh a, sumtawng ah meiphualpi hong cihsak uh a, Gospel tengin meiphualpi awi in amau zingsang an hong huansak uh hi. Haiciin lam pen lampi neu mahmah banah mawtaw gol pai ngei nai lo ahih manin Dyna tawh pai ding hong awi lo ciat uh hi. Mawtaw neipa in Pasian muanna tawh pai teitei ding ci, ahih manin ka pai suak veve uh hi.

Lampi neu in a khanglam keen thei mahmah sawnsawn ahih manin lau huai mahmah hi. Haiciin khua ah leitung pian zawh Dyna a lut cil hi a, tuahsiat theih nading mun tam mahmah hi ta se leh mawtaw neipa Sian Lian in Pasian leh Zogam adingin a mawtaw itsik het loin hong zangsak a, amah mahin lauhuaina tampi kawmkal ah lungduai takin hawl hiat-hiat lel hi. Mawtaw saap hong la ngei lo bek tham loin Tedim ah Khitui Gospel Teamte limtakin zin hong dou tawntung uh hi.

Lam tawntung ah hong tonpih Topa Pasian hehpihna hangin Zogam khuapi khat ahi Haiciin khua cidam takin nitak nai 7:00 in ka tung zo uh a, tumging leh aw liatna teng thuah mengmengin nitak kikhop nuamtakin ka zang thei pah uh hi. Topa Pasian in kha khanlawhna hong kipansak pah hi.

Nisimin Topa Kha Siangtho in na sem den ahih manin mi tampitakin a mawhnate uh pulakin  khitui naptui tawh Topa Jesu kiang zuan thei uh hi.

Khangno tampitak kikhel uh a, khamtheih guihtheih khempeuh paisanin Topa Pasian deihna bangin ka gamta ta ding hi, ci in kiciamna khut lamto uh hi.  A tek pen pan a moi pen dongin Pasian Kha Siangtho nasepna sungah kihel ciat uh a, lungdamna tawh kidim ciat uh hi.

Naupangnote tungah zong Pasian Kha Siangtho hong tung ahih manin kap kawmin thungen uh a, a mawh khempeuh uh a puakkhiatsak Pa Topa Jesu tungah lungdamna khitui tawh lungdamna ko ciat uh hi.

Tuailai khangnote in Topa Jesu itna a tel uh ciangin a mawhna khempeuh a maisak Pa tungah lungdam lua-in nau kahin kap khia liang uh hi.
 

March ni 4 ni nipini in Tualkhiangte naupang 3 mang ahih manin a zonpih dingin Haiciin khua panin mi pawl khat va pai uh hi. Hong ciah lam uh ciangin a tuanna uh mawtaw lam khangah kia in mi tampi liam uh hi.  A phadawm zawdeuh teng Siksakol manlang tawh Haiciin lam ah pua uh a, a liampha zato puak kul teng Mawtaw neipa U Sian Lian thusiamna tawh Gospel ten Suangdai khua khen India mawtaw omna dong va kha uh hi.

Mawtaw pen lampi panin saupi kikhuk suk hi mah ta se leh sih nading lauhuaina panin Pasian in a mite kem hi. A liam pawl khat a om tei hangin luang beina liang om lo hi. Khut tawng khe tawng liang zong om lo hi. Nitak biakpiakna nuam takin kizang thei veve hi. Tawp nitak dongin gupkhiatna ngah mi kibehlap tawntung hi.

Tutung Haiciin crusade adingin inntekpi a sem Khup leh Niang hi a, amau Haiciin khua tualsuak ahi uh hi. Pasian in gam minthang USA ah a tunpih ciangin a khua a tuite in Pasian a muh ding deihsak lua uh ahih manin sum leh pai tampi bei-in crusade bawl uh hi. Pasian in amau nupa thupha hong piaksak ta hen.

HAICIIN CRUSADE A KIHEL THEI KHITUI GOSPEL TEAM TENG
Anung lam vei pan ziat; (1) Pum Thang (2) En Thawn (3) Nunu (Sian Lian tanu) (4) Cingpi (Sia Thawn’ tanu) (5) San Nuam (6) Kimbawi (Sia Do Khup’ tanu) (7) V.C Mang (8) Sian Lian (Mawtaw neipa)
Amai gual; (1) Lian (2) Sia Thawn (Lamzang ZBCM Pastor) (3) Sia Do Khup (4) David Tuang (Sia Do Khup’ tapa) (5) Thang Khen (Lamka CBA upa)

1978 kum in a nu si a, 1985 kumin a pa si ahih manin tagah mahmah hi. Lai tan giat ciang bek sim hi.

5.1.1996 (Sun) ni-in Samte beh Pu Sial Cin leh Pi Ning Za Ciinte’ tanu Lia Cing Suan Niang tawh Rev. Go Khen Thang in Kansau (A) Tuiphum pawlpi biakinn sungah Siangtho kitenna neisak hi. Topa’ thupha tanu tapa nga nei hi.
1. Tg. Thang Muan Mang @Mangpi M.Div. I yr.
2. Lia Cing Ngaih Kim @Kimbawi B.A (Eng.)
3. Tg. Cin Sian Tuang @David    B.A  (Eng.)  I yr.
4. Lia Ciin Khawl Lun @Lulun Grade V
5. Tg. Nang Lam Thang @Thangpi Grade IV

29.8.1990(Wed.) ni-in piangthak hi. 15.1.1991(Tue.) ni-in Rev. Neng Suan Thang in Tuivai lui ah Tuiphum hi. A pianthak kum mahin Topa leenggah huanah nasep kipan pah hi.

1991 Kumin “Nuntak kikna” kici lakhui 200 hawm khia hi.

1994 Kumin “Khitui Gospel Nasepna” phuan hi.

1996 Kumin “Khitui Gospel Lainatna Aw” kici laikhui 2000 khawm khia hi.

1998 Kumin Australia gam ah Pasian thugen in pai hi.

2000 Kumin “Hauhna leh Khansauna Thusim” kici laibu 2000 hawm khia hi.

2001 Kumin Japan gam ah Pasian thugen in pai hi.

2002 Kumin Singapore leh Malaysia ah Pasian thu genin pai hi.

2002 Kumin Khitui Gospel Nasepna (Tears Gospel Ministry) sungah “Khitui Gospel Mission Nasepna” (Tears Gospel Mission Dept.) behlap a, gammial nasep kipan hi.

2003 Kumin “Ngaih Anglai Ah” kici Video CD hawm khia hi.

2004 Kumin “Hauhna leh Khansauna Thusim” bu 1000 bawl kik hi.

2004 Kumin Tedim Bethel Bible College ten pahtawina tawh Bachelor of Christian Ministry (B.C.Min.) pia uha, Thesis in “Khitui Gospel Nasepna” laibu bawl hi.

2005 Kumin “Ngaih Anglai Mah” kici Video CD hawm khia hi.

2006 Kumin “Ngaih Anglai” kici Video CD hawm khia hi.

2007 Kumin India Manipur Zomi ten “Hauhna leh Khansauna Thusim” bu 1000 bawlkik uh a, Manipur khut nuai a om Zomi omna Universityte ah B.A IIIyr ten sang laisimbu in tawi uh hi.

2007 kum in Malaysia ah Zomi Christian Fellowship, Kualalumpur khuapi ah crusade va bawl hi.

2007 kumin Sermon VCD Malaysia ah a crusade bawlna hawm khia hi.

2008 Kumin India Mizo gam, Moreh, Lamka, Shillong, Guwahati, Delhi, Pune, Bombay khuate ah Pasian thugenin pai hi.

2009 Kumin Malaysia ah Pasian thugenin pai hi.

2009 kumin S.Korea ah Pasian thu gen in pai hi.

2009 Kumin www.tearsgospel.com kici biakna website khat bawl hi.

2010 kumin Australia ah Pasian thu genin pai hi.

2010 kumin COPE topa phawkna SIAN ANGLAI AH DR. J.H COPE kici DVD bawl khia hi.

Zomite khalam leh taksa lamah ih khanlawh nading, ih mit hong kihonna dingin a tuam vilvelin Pasian in hong zatsak Evan. Langh Do Khup hi a, Zogam singtang khua tampi sikin Pasian nasem a, 1990 kum pan 2011 ciang crusade lianpi 170 vei valbang bawl khinin crusade neute tawh gawmin 400 vei val bawl khin hi. (* Crusadepi ni 5 tungsiah, Crusade neu ni khat pan ni nga kikal* *Thu hilhna pan mi khat apianthak nak leh crusade in sim hi.*)

Pasian biakna la, Gam ngaih la, Zawl la leh Zola (pupa’ awkaih) dawng tampi phuak a, ama phuah khanlawhna late bang kideih mahmah hi. “Lainatna ‘aw’(or) Itna Sisan Luangin” cih la bang pawlpi tampi in sumpi donna la-in zang uh a, pau nam tuamtuam ten zong amau pau tawh lekkhia-in sa uh hi. Pasian in leivui panin a laptohna leh gamdang dongah Lungdamna thu genin a paisakna, Misite tho, Dawiveite pil, cinate dam, Dawimangpa hencip mi tampi in suahtakna gupkhiatna a ngahna Pasian nalamdang bawl a muh khakte hih bangin pupa’ la awkaih tawh phuak hi.

(a) Zinmang laal hang ka nawh ni’n ee, tuizum lenmual kal ing ee.

(b) Zin laihen teng ka sutna aw, Sianmang’ namtem hiam sang ee.

“Hauhna leh Khansauna Thusim” kici laibu khat Khasiangtho lamlahna tawh gelhin Laisiangtho sung simloh laibu dang pan lalo (Quotation omlo) hi. Amah mah in Computer tawh khen a, Cover design zong suai in bookform in bawlpah hi. Tu-in ama gelh hih laibu, Lamka Manipur University, Manipur State, India ah B.A IIIyr. ten sang laisimbu in tawi uh hi.

Zomite minam dangte mah ih bat zawh nadingin ih mit hong keuhsak VCD hoihnono hong bawlsak a, a tangthu ding amahmah in gelhin, tua thu tawh kituak dingin la phuak pah a, amahmah in zaih(Shooting)in, amahmah mah in Editting zong hi. Cover design zong amahmah in bawl (suai) pah hi.

Na khat peuhpeuh a sep ciangin ama siamtawp suahin limtakin sem hi. Ama kalsuanpih Laisiangtho in, “Limtak in hih lecin, nang hong kisanglo ding ahi hiam?….” (Pian.4:7)cih ahihi.

(Hih tangthu pen Rev. G.K Nang in ama thesis sunga a hel ding leh Kalaymyo Agape pawlpite bawl Zogam Khanlawhna kici laibu sunga hel dingin amaute hong ngetna bangin a kibawl pak hi a, a hun tom ahih manin kicin lohna tampi om ding hi.)

Thu kaikhawm;
Sia Kham Sian Pau
Mission Director
Tears Gospel Ministries
Kalaymyo

Vanglian Topa Pasian in thungetna hong dawng takpi hi, cih ih mu ding a, lungdamna ih ko kik ding hi. Thungetna in bangzah takin vang nei hiam? cih ih tel ding hi. “Lamet bei-in om kei in, Vanglian Topa Pasian ih nei hi.”

Ciimnuai vontawi Zomite adingin khitui tawh thu a ngen ngen Khitui Gospelte’ thungetna tampitak ih biak Pasian in hong dawng khin ta hi. Cinate in damna ngah uh a, Dawiveite nangawnin damna ngah uh hi. Kum 10 val kawng nuaisiah a zawcipte dingin lampai thei uh a, ta nei theilo numei tampi in ta nei uh hi. Khamtheih guihtheih a zongsang khangno tampitak kikhelin Pasian tate cihna ngah uh hi.

The Tears Gospel Ministry was in need of funding to continue the Mission in the pioneers areas of Myanmar. You and your local Church could get involved in this Mission.

You can sponsor 1 Pioneer Missionary monthly by donating US $ 125

Traveling Expense of 1 Missionary to reach the mission field by donating US$ 70

Paying the house rent (Monthly) of 1 Missionary in the field by donating US$ 700

Buy the  new Missionary, basic household item in the field by donating US$ 250

Buy them humanitarian aid such as clothes, used clothes, and medicine for the new field by donating US$ 250

Sending Missionary could cost up to US$ 1000  to setup a new field.

All are welcome to be partners in this mission, you can reach at Email:khituigospel@gmail.com or visit their site Tears Gospel Ministry for more information.

Antang ip 130 thum kikhawm khia thei a, khua tuamtuam panin antang pua dingin hong pai ciat uh hi. Nuntak haksa mahmah uh ahih manin nuam mahmah ciat uh a, piak tham mahmah uh hi. Taksa leh kha ah ih puah ih zun ding kisam mahmah lai uh hi. Pasian in thupha pia ahih manin innkuan tam thei bilbel uh a, tate nek leh dawn ding, sangkahna ding cihte buaipih mahmah uh hi. Zawn luat manin tate lai sim ding zah a simsak zo lo tampi om uh hi. Mai lam hun ah Hostel (Bawda) zong nei zo leng pilna lamah khang to mahmah ding uh hi.

Ih Mission Director ahi Sia Kham Sian Pau kum simin pai den ahih manin it mahmah uh hi. Mimal zui-in antang kihawm ahih manin innkuan tamte in a ipipin ngah zo uh hi. Meigongte, tagah leh mipoite kitam piak deuh hi. Kanpalet Township Baptist Association Hostel a om sang naupang teng zong antang leh sum tawm ciat kipia hi. 2009 kumin zong khatvei tu a mah bangin antang kihawm ngei zo hi.  Hih bangin huhna ih piakna hangin Missionaryte nasepna lawhcing tuam mahmah hi. Khristian hong suak thak om den hi.

Pakawn khua a om Missionary Sia Khai Cin Kap’ Nu ahi, Pi Cing Za Ciin kivuina han mual ah ka va pai uh a, thungetna ka va nei thei uh hi. Khitui Gospel Mission Nasepna ah a luang a phum masa pen suak hi. Sia Khai Cin Kapte innkuan pen Khitui Gospel Mission nasepna ah ma a pan zawh uh kum 8 hi ta, 2012 pan 2012 term khat ki ap to lai uh ahih manin Khitui Gospel Mission Nasepna ah kum 10 a sem ding uh ahi hi.

Topa Pasian adingin a nuntakna a pia C.C.O.C palai Vungh Khan Kham han zong ka va veh uh a, lopa in na tum ta ahih manin lopa teng ka vat siang uh hi. Khitui Gospel Missionaryte in a koih uh KHITUI GOSPELTE’ PHAWKNA kici pak bel zong na lui mahmah ta in a pak zong na keu ta hi. A han lopa in zam khumin phawkna pakte a vul hangin Topa adingin a nuntakna a piakna thu pen vul ngei lo bek tham loin palh pha semsem zaw hi. Hih Vungh Khan Kham han ah Khitui Gospel Missionaryte in kum simin thunget khopna khatvei ta nei zel uh hi.

Pasian a it mahmah min pulak ding a phal lo Pasian’ tanu khat ii vaihawm siamna tawh a kibawl Khitui Gospel Tuikhuk zong ka va en uh hi. Gam lapi panin Thai pipe hoihte tawh tui a kilaksak hi a, Pakawn khua zangin nuamtakin tui zang ziahziah uh hi. Khitui Gospel Mission Nasepna tungtawnin Nuntakna tui kha lam pan hi ta leh taksa lam pan hi ta leh kham takin dawn thei ta uh hi.

Kanpalet ka om sung uh Pakawn khuazang in an hong nekpih uh a, Khauhthu khua aitangin zong an hong vak uh hi. Kanpalet Township Baptist Association zumpi ah hong tungsak uh a, an nek tui dawn a bei khempeuh zong amau inntek sem pah uh hi.  11.1.2012 Wednesday ni zingsang nai 4:00 in Kanpalet panin Kawlpi zuanin ka ding khia leuleu uh a, ni khat thu mahin Kawlpi cidam takin Pasian in hong tun pih hi. Pasian min thang ta hen.

Hunhoih hunsia cih khen tuanloin Pasian’ thu hilh ding na kin ngaihsutna ding, lungduaina tawh mite’ lungsim zo-in, mite taii-in, hanthawnin na hilhna dingin thu a hong pia ka hi hi. (Timoti Nihna 4:2)

Hih a tung a Lai Siangtho mun nihte in Pasian’ na kin takin ih sep ding hong sawl hi. Zomi Pasian thu umte in Topa na ih sem nuam ciat hi. Ahi zongin ih hauh ding, ih pil ding, a hun lem ding ih ngakngak nalamin hunin hong khengkheng a, Topa adingin bangmah sem man loin hun leh ni in lenmual hong khup san zel hi. Bangmah sem loin kum hong thak toto hi.

“Huih leh guah ngakin khuahun hoih dong a ngak mi in khaici tuh ngeilo ding a, an zong la ngeilo ding hi.”  ci ahih manin tuni a ih dinmun penpen tawh Topa Pasian adingin ma ih pan pah ding ahi hi.

1. Na hat leh tam sep ding
2. Na hauh leh tam piak ding
3. Na pil leh tam hilh ding

tua mah bangin

1. Na thanem leh tawm sep ding
2. Na zawn leh tawm piak ding
3. Na hai leh tawm hilh ding

Tu laitak na dinmun zui-in sem hamtang dingin kiging lecin Pasian in na ma hong vangsak ding hi.

“Hunhoih hunsia cih khen tuanloin Pasian’ thu hilh ding na kin ngaihsutna ding, lungduaina tawh mite’ lungsim zo-in, mite taii-in, hanthawnin na hilhna dingin thu a hong pia ka hi hi.”  ci ahih manin na dang khempeuh sangin Pasian thu hilh ding pen a thupi penin ih koih ciat ding ahi hi. A omsa pawlpite Pasian deihna tawh kituakin a gamtat a luhek theih nadingun CRUSADE bawlin Pasian thu ih hilh ding a, Pawlpi cih bang a om nai lohna mun ah MISSION nasep semin kha mangthang ih man ding hi.  ”Kei lem nai keng” cici kei in. 2013 hong tung pah ding a, na kum zong hong tam semsem ding hi. Topa adingin bangmah sem loin kum khat hun hong mawk bei zel ding hi. “Khai na tuh kei leh an la ngei lo ding” ci mawk hi.

2012 KUM THAK NA BANG CI ZAT SAWM HIAM?

Khuata mipa

Evan. Langh Do Khup