VIDEO THAK "SIAN ANGLAI AH" WEB MEDIA SUNGAH OM HI.

VIDEO THAK TANGKONA KI EN THEI TA HI.  (Web lutung a om MEDIA sung lut lecin om ding hi.)

Tu in Zolai hong bawlsak pa J.H.Cope hong pai zawh kum 100 cing ding hi ta hi. Khristian biakna in Zomite nuntakna hong khel zia leh J.H.Cope hangin Zomite ih phattuamna, ih hamphatnate phawkna ding leh ciapteh nadingin video hoih mahmah khat kong bawl khia uh hi. Topa Pasian in hong thukimpih ahih manin lim lak ding teng ka la khin ta uh hi. Leptuahna ka bawl laitak uh hi a, a sawt loin kihawmkhia thei ta ding hi.

Cope topa hong tuntung lai a, Zomi sunga pau namtuamtuam Sihzang, Zo, Phaileng, Teizang cihte zong kihel a, pau namkhat panin a pau zangte ngiat nungak tangval kop khat ta hong kihel uh hi. Cope topa' hun lai a Cingno leh Thangno tangthu hi a, muh nop, zak nop banah khasiat huai lungzuan huai thu tampi om hi. Zogam khanglam mong a om mualsang pen Victoria mual panin Zogam saklam mong Kansau gam dong kikal mun hoih tuamtuam kila kawikawi hi a, Zogam a ngaite adingin lungkim huai mahmah ding hi.

Singtang buhno dum dildial lak khawngah Thangno leh Cingno' kihonate lunglut huai, lainat huai mahmah thu tampi om hi. Dawi leh Kau upna in Zomite bangzahtakin gentheisak hiam cih thute Thangno leh Cingno kingaihna tungtawnin kimu kik thei hi. Ngeina Zolapite leh tulai la tualleng hoih nono zong kihel hi. Lasa siam V.C Mang leh Nuamlek in lunglen huai takin sa uh a, Nuam leh Nembawi mithak la siam nungak nih in zong sa sialsial uh hi.

A limte HDV camera tawh hoih takin kila ahih manin siang mahmah a et nuam mahmah hi. A thu a late, a awte zong a siang theithei dingin kihanciam ahih manin pau kitello nemnum cih bang om lo ding hi.  Kawl gam sum   Ks. 40,00,000 (US $ 4000) val bei-in kibawl hi a, ih ngah kik ding tawh kituak lo liangin kibawl ahi hi. Ih Pasian in Zomite hong laptohna teci panna leh Zomite' ngeina hoih tuamtuam, kammal hoih tuamtuam, thu leh la hoih tuamtuamte kepna thu saalpi ahi hi.

Cope topa hun lai a, Ukpite (Innpite) leh Tapidawte (Christian) kikal thute zong kihel hi. Hih bang thute hel theih nadingin Ukpite' suan leh khak makaite in phalna hong piak manin hih video pen picing tuam mahmah hi.

Kong muhsak ding kal ngaklah mahmah ungh ei, Zomi laizom u leh nau aw.