Tuangpute unau’ Nu leh Pa ahi, Pa Khen leh Nu Lian in kum 8 sung tawntung singinn dawl nih hoih mahmah sungah hong omsak uh a, inn sap pek khat zong hong la ngei lo uh hi. Inn sap hong la lo bek hi loin nek leh dawn, silh leh ten hong guan tawntung lai uh hi. Khatvei sunsun lungdamkohna ankuang umna khat amau inn ah ka va bawl uh a, ka ciah uh ciangin letsong tampi hong guan uh a, mothakte nua lam kawm tuahpha ngelte hong bangsak mawk uh hi. Khitui Gospel Innpi ih lam ciangin zong amau inn lamna van zatte zuak uh ahih manin Pa Khen leh Nu Lian in “Ka nau inn tuan bangin hong ngaihsun ung, na kisap zahzah la in” hong ci lai lai uh hi. Amau sai panin inn lamna vat zat kisam tampi kila takpi hi.
Hih zahtak a Pasian nasemte a it Pa Khente innkuan pen USA a tun nadingun Malaysia leh India ah ngak kul lo hi. Yangoon Airport panin USA gam zuan dingin tawldam takin leng khia thei uh hi. USA a tun uh ciangin zong Pasian in thupha pia a, Khitui Gospel Nasepna hong huh zo lai sawnsawn uh hi. Topa Vanglian Pasian in a innkuan un nopsakna, khansauna, leh thupha namcin hong piaksak ta hen.