Lawmte aw, ka pianna ka lamkiatna malkual ah Crusade lianpi khat bawl sawm ungh. Tua adingin Thu ngetna, sum leh pai, thu leh la tawh nong panpih thei hi. Topa Kha Siangtho in na lungsim hong lawn zenzen leh khituigospel@gmail.com ah hong zasak kik ve maw.
MALKUAL GAMPALAK PANIN KIKONA AW
To, 19.12.2009 (Sat)
Zingsang 2:05 AM
Topa Jesu Khazih sungah kong it Zomi lawm leh gual teng:
Ih Topa Jesu hong hehpihna thupha note khempeuh tungah hong om den ta hen. Khazih Topa leh ih Zogam adingin na ka sep zawh kum 20 hong cing ta hi. Gamdang ah Pasian in hong puak zel a, ahih hangin ih gam ih lei ah hong ciahsak kik zel hi. Zomi ka laizom note khempeuh huhna hangin tu ni dong lawhcing takin Topa’ lenggah huanah ma ka pang thei a, Topa Pasian in na lamdang lianpipite hong musak tawntung hi. Pasian min thang tawntung ta hen.
Tua a vanglian Pasian’ Kha Siangtho in ka lamh kiatna Malkual ah Crusade bawl dingin hong hanthawn hi. Malkual ah khanlawhna lianpi hong tunna hangin a zawngte hau ding, a haite pil ding, a cinate dam ding a, Zogam ah khanlawhna lianpi hong tung kik ding hi, hong ci hi. “Topa aw, tua bangin piang thei ding hiam?” Ci-in ka kha panin ka dot ciangin “Nang Langh Do Khup zong malkual khuata penpen panin kong sam khia a, thupha tampi kong pia hi” hong ci hi. Hih crusade hangin mi tampi nuntakna kikhel ding a, Pasian’ mizat minthangte, mipil misiam, mi vangliante, Gam leh lei a ukte hong piang khia ding hi.
1990 kum pan tu ciang kum 20 sungah khanlawhna hangin Pasian in Zomite hong lamsang mahmah a, leitung mun tuamtuam ah hong kizelsak hi. Thupha tampi ih sang ciat hi. Ei nung hong thuap ding khangnote in Pasian Kha Siangtho a neih ding uh kisam mahmah hi. Tua hi kei leh khamtheih guihtheih in hong kaih mangsak ding a, ih khangnote AIDS natna in hong thahsak khin ding hi. Zolei giabang a zun ding tuailai momnote Topa in deih hi.
Hih Crusade vai ding ka gen ciangin Tg. Khup Muang leh Tg. Saipi in “Sia aw, ko gelin ong hanciam nung” hong ci pah uh a, US $ 6000 hong kamciam pah uh hi. Hih Crusade pen Pasian deihna om taktak hi, cih ka mu a, Topa tungah lungdam ka koh kawmin gam leh lei veina khitui hong luang kha zel hi. Hih Crusade pen pawlpi deidan om het loin a kibawl ding hi a, Zogam ah a om ngei nailo, zong a om kik mengmeng lo ding Crusade lianpi hi ding hi. Hih Crusade ah nisimin Ganpi khat ta kigo den ding hi. Taksa leh kha ah ih mipihte a gilvah nadingin Pasian in thupha hong pia ding hi.
Hih Crusade adingin nang zong mapang nuam hamtang ding cih kong lamen a, Pasian in nangmah hun hoih hong piakna thu kong zasak hi. Supna baina leh liau tuahna bangin na ngaihsut khak ding ka dah hi. Pasian in leivui panin nangmah hong lamto a, hih ciang dong hong tun hi. Khamangthang khat beek tonpih loin Topa’ mai mu ngam ding na hi hiam? Hih laikhak tungtawnin Topa Pasian in nangmah hong hopih hi. Hih a nuai a lamal lungngai inla, Topa tawh na kiho khit ciangin na khensatna bangbang hong zasak kik in maw.
Na neih na lam khempeuh kong piaksa hi a,
Khat zong sit loin la kik thei Pa ka hi,
Hizong la kik kei ning, na phal bang pia in,
Van ah nong ciah ciang na hawmthawh kha diai?
Topa’n nang hong sam, Lainatna aw tawh,
Ka na sem dingte tawm lua ee,
Mangthang khate kiang itna thu gen ding,
Nang hong sawl ning ee, na hi zo diam ci?
A hun ding pen Tan 10 te laivuan man phet hi ding a, a mun ding pen Cikha, Khuadam leh Kansau kikal mipi om nadingin tui leh mun a nopna penpen hi ding hi. Gupna thu bek kigen ding a, kuama pawlpi kigensiatsak lo ding hi. Leitung Pawlpi zonna hunin zong kizang lo ding a, ei omna pawlpi ciat panin piangthakin Pasian Kha Siangtho kisang ciat ding hi. Lasa siam, Music siamte zong kitonpih ding a, Music van kim Drum set dongin kizang ding hi. Malkual ah a om ngei nailo Music van kim tak tawh Pasian’ minphatna Pasian biakna hunin kizang ding ahih manin a hun hong tun ding kal ka ngaklah mahmah ta hi.
Hih malkual Crusade hangin a piang thuphate ih dam sung mahmah in Topa in hong musak kik ding a, tua ciangin ih sup ih baina, ih gim ih tawlnate ih mangngilh ta ding hi.
Malkual gampalak pan a kiko pa aw in;
“Ih pianna gam leh lei a zun dingin nang hong zawn hi”
Malkual gampalak panin;
Evan. Langh Do Khup
Founder & President
Tears Gospel Ministries
(a) Zolei giabang zun ning cileng Khattang mabang zam lang ee.
(b) Khattang mapang zam lah tang ee Laizom na min lo ing ee.
(a) Lamh gialkiatna Malgam lei aw Zun loh lenpaan kai aw ee.
(b) Sian sinthu tawh giabang zun ding Tanggual ih kim lai nam aw.
Lainatna tongdam nemno tawh; Evan. Khup