Zomite tampi ih omna Aizawl khuapi ah crusade bawl dingin 2010 November 15 nitak nai 8:00 pm in Kawlpi panin ka ding khia uh hi. Taikua khen khit Etlawm Mual Z.Y.A te tuikhuk ka khen khit deuh uh ciangin mawtaw hong sia pah malam hi. Tua lai ah zingsang nai 4:00 AM dong ka om uh hi. Khuadam mahmah ahih manin ka ihmu thei kei uh a, gam lakah giah loh sawt ta ahih lam Topa Pasian in hong phawksak a, ama hehpihna ka phat zaw uh hi. Ciau cidamin ka tung uh a, Aizawl lam a ten Kawlgam lam gal dong somo mawtaw nuamtak tawh hong dawn uh hi. Tonsim khuanawl ah palik (police)ten Mizo pau tawh thu hong dong niloh uh a, Khitui Gospel nungakte khatin dawng se loin a et gega leh palikpa in “Ka pi dan a ni lo” ci-in heh peuhmah hi. A tawpna ah mawtaw hawlpa in “Kawlgam mi hi mah uh, crusade bawl ding a kisam hi” a cih leh “Den pekin bangdia hong gen pah lo” ci in hong paisak bilbel uh hi.
“DAN A NILO, TAMPI TOPA HANGIN DAN HONG HI ZEL HI” November 17 ni zingsang 2:00 pawlin Aizawl ka tung uh a, khangnote in zanmeng liang mahin hong na ngak uh hi. Kisilin an ka nek khit uh ciangin khua hong vak kuan ta ahih manin ihmu nawn loin leitung mun tuamtuam a lawmte tawh ka kiho kawikawi uh hi.
Nitak simin Kha khanlawhna lianpi hong piang ahih manin Aizawl Z.B.C biakinnpi dim letin hong kikhawm uh hi. Biakinn sungah ta zolo tengin biakinn tual panin Pasian thu ngai uh a, a gam lum kuamah om se lo uh hi. Pawlpi Upa Thawng Pau in a thu zaksakna ah, “Zomi hih zah Aizawl khuapi ah ih kikhawm ngei kei hi” ci hi.
A nungta Pasian mai ah a mawhnate uh pulakin kisikkikna khituite leh lungdamna khituite luangsak ciat uh hi. Zomite mi gam mi lei ih tun hangin ih omnana ah ih Topa Pasian in hong zong kawikawi ahih manin Pasian it minam ih hihna hong kilang mahmah hi.
1997 kumin Aizawl ah Khitui Gospel Team in crusade a kibawl lai in Zomite in biakinn kinei nai lo hi. Mi inn sapin kikhawm ih hih manin lampi panin nawngkaisa a hong tawngtawng zong om mawk hi. Tua bek tham loin tawp nitakin Khitui Gospel Teamte mangpha khak nading la sin a om Lia Ciin Suan Niang (Tedim lawibualte) mencim in vuk kha-in hong nusia mawk a, dahna kahna tawh hun kizo hi. Tua lai in Zomi innkuan cih kipawlna om nai lo ahih manin a luang kipua zolo a, Aizawl ah kivui mawk hi. Tu in ahih leh “Zomi Innkuan” cih kipawlna na om ta a, Kawlgam pan a pai Zomite a sih khak leh ciau dong a luang kha ngiat uh hi.
Tualboih leh Sia Pau vaihawm siamna tawh Aizawl thupina teng leh a nopci mun tengah hong paipih uh a, Khitui Gospel nungakte nuam mahmah uh hi. Hih crusade a piantheih nadingin inntek pawlpite hanciamna leh Australia Zomite hanciamna ahi hi.